Qozog‘iston hukumati 5-fevral kuni iste’foga chiqdi. Prezident Qosim-Jo‘mart To‘qayev tegishli farmonni imzoladi. Bu haqda “Oqo‘rda” xabar berdi.
Respublika rahbari Roman Sklyarni vaqtinchalik bosh vazir vazifasini bajaruvchi etib tayinladi.
“Qozog‘iston Respublikasi konstitutsiyasining 70-moddasiga muvofiq qaror qilaman:
- Qozog‘iston respublikasi hukumatining iste’fosi qabul qilinsin.
- Qozog‘iston respublikasi bosh vazirining vazifalari vaqtincha Roman Vasilyevich Sklyar zimmasiga yuklansin.
- Qozog‘iston respublikasi hukumati a’zolari hukumatning yangi tarkibi tasdiqlanmaguncha o‘z vazifalarini bajarishda davom etadilar.
- Mazkur farmon imzolangan kundan e’tiboran kuchga kiradi”, — deyiladi To‘qayev imzolagan farmon matnida.
Roman Sklyar 1971-yil 8-mayda Pavlodarda tug‘ilgan. 2023-yil 3-apreldan Qozog‘iston bosh vazirining birinchi o‘rinbosari lavozimida ishlab kelgan. Eslatib o‘tamiz, hukumat rahbari lavozimini Alixon Smoilov egallab turgandi.
Alixon Smoilov 2022-yil 11-yanvardan Vazirlar Mahkamasi rahbari lavozimida ishlab kelayotgandi. Uning yangi lavozimidagi ilk harakatlaridan biri 180 kun davom etgan yonilg‘i narxlarini davlat tomonidan tartibga solish bo‘ldi. Yanvar voqealari paytida qozog‘istonliklarning noroziligiga rasmiy sabab aynan suyultirilgan gaz narxining oshishi bo‘lganini hisobga olsa, buni hukumatning adekvat javobi deb baholash mumkin.
Qo‘shni respublikada 7-fevral kuni hukumatning kengaytirilgan yig‘ilishi bo‘lib o‘tadi.
Senat majlisi chog‘ida parlament yuqori palatasi spikeri Maulen Ashimbayev hukumatning kengaytirilgan yig‘ilishi 7-fevral kuni bo‘lib o‘tishini ma’lum qilgan.
Avvalroq prezident Qosim-Jo‘mart To‘qayev yil boshida e’lon qilingan intervyusida hukumatning kengaytirilgan yig‘ilishi o‘tkazilishini aytgandi. U sentyabrdagi murojaatnomasida yangi iqtisodiy modelga o‘tish vazifasi qo‘yilganini ta’kidlagan. Strategik maqsad 2029-yilga kelib YIMni ikki barobarga oshirishdir.
“Yaqinda hukumatning kengaytirilgan yig‘ilishi bo‘lib o‘tadi, unda biz ijtimoiy-iqtisodiy rivojlanish yakunlarini sarhisob qilamiz va bu boradagi keyingi harakatlar taktikasini belgilaymiz”, — degan edi Qosim-Jo‘mart To‘qayev.
Izoh (0)