“Oyoq kiyimlarimiz 5 ming so‘mdan. Bundan biroz foyda ham qoladi” (video)

Ijtimoiy tarmoqlarda Namangandagi bozorda 5 ming so‘mdan oyoq kiyimlar sotilayotgani, bunday narx hatto Xitoyda ham yo‘qligi bildirilgan video tarqaldi. “Daryo” muxbiri Azizbek Abduvaliyev ushbu bozorga borib, sotuvchilar bilan suhbatlashdi.

Namangan shahrining Davlatobod tumanidagi “Yashil” dehqon bozorida haftaning shanba kunlari sotuvchi va xaridorlar bilan gavjum bo‘ladi. Bu yerda qishloq xo‘jaligi mahsulotlari, kiyim-kechak, ehtiyot qismlar, maishiy texnika va mebel ulgurji sotiladi.

Bozor atrofida esa shu kuni eski buyumlar savdosi avj oladi. Jumladan, poyabzallar savdosi ham.

Poyabzallarni Toshkentdan olib kelamiz. Assortiment turlicha: etik, tufli, krossovka, shippaklar. Ularning ichida ishlatilgani ham, deyarli yangilari ham bor. Ulgurji olganimiz uchun yo‘lkirani qoplab, biroz foyda ham qoladi, — deydi sotuvchi Adhamboy Nosirov.

Sotuvchining aytishicha, ijtimoiy tarmoqlarda shu haqdagi video tarqalganidan so‘ng xaridorlar soni keskin ko‘paygan. Olib kelinayotgan mahsulotlar esa ikki shanbadayoq tugamoqda. Sotuvchining o‘zi bu holatni “Hammada ham yangi oyoq kiyim sotib olishga pul bo‘lmasa kerak-da” deb izohlamoqda.