“Ziyoratchilarning bir qismi O‘zbekistonga qaytarildi, qolgan fuqarolarimiz ham yaqin fursatlarda Vatanimizga yuboriladi” — O‘zbekistonning Jiddadagi Bosh konsulxonasi

Ijtimoiy tarmoqlarda Umra amalini bajarish uchun Makka va Madina shaharlariga kelgan hamda O‘zbekistonga qaytish bilan bog‘liq qiyinchiliklarga duch kelgan o‘zbekistonlik ziyoratchilar haqida xabarlar tarqalgan edi. O‘zbekistonning Jidda shahridagi Bosh konsulxonasi holat yuzasidan maʼlumot berdi, deb xabar bermoqda “Dunyo” AA.

Maʼlum qilinishicha, o‘zbekistonliklarning safarlari xususiy sayyohlik kompaniyalari tomonidan tashkil etilgan. Mazkur holat aviaqatnovlarni amalga oshirishdagi texnik nosozliklar, shuningdek, turistik kompaniyalarning bu kabi safarlarni tashkil etishda zaruriy malaka va tajribaga ega emasligi tufayli yuzaga kelgan.

Hozirda O‘zbekiston Transport vazirligi va boshqa mutasaddi idoralar bilan birgalikda fuqarolarni qaytarish bo‘yicha barcha choralar ko‘rilmoqda, qo‘shimcha reyslar jadvali tuzilgan. 4-fevral holatiga ko‘ra, ziyoratchilarning bir qismi O‘zbekistonga qaytarildi, qolgan fuqarolarimiz ham yaqin fursatlarda mamlakatga yuboriladi.

O‘zbekistonning Ar-Riyozdagi Elchixonasi va Jidda shahridagi Bosh konsulxonasi vaziyatni o‘z nazoratiga olgan va doimiy ravishda monitoring olib bormoqda hamda yurtdoshlarimizga zarur konsullik, huquqiy va boshqa yordamlarni ko‘rsatmoqda. Yuqoridagilardan kelib chiqib, fuqarolarimizdan xotirjamlikni saqlashga va Saudiya Arabistonidagi amaldagi qoidalarga rioya qilishlariga chaqiramiz, – deyiladi xabarda.