Toshkentda o‘zganing mashinasini olib qochgan shaxs 2 yilga qamaldi

Poytaxtning Chilonzor tumanida kaliti ichida qoldirilgan Nexia-2 nomaʼlum shaxs tomonidan olib qochildi. Bu haqda “Zamon” dasturida xabar berildi. 

Maʼlum qilinishicha, organ xodimlarining qidiruvidan so‘ng mashina Sergeli tumanidagi yo‘l bo‘yidan topilgan. Chilonzor tumani IIO faoliyatini muvofiqlashtirish bo‘limi, ekspert-kriminalistika bo‘limi xulosasi asosida o‘g‘irlangan mashina ichida qolgan barmoq izlari orqali jinoyatchi topildi. 

Jinoyat ishlari bo‘yicha Chilonzor tumani sudida qashqadaryolik 38 yoshli sudlanuvchi Jinoyat kodeksining 267-moddasi 1-qismi (transport vositasini olib qochish) bilan ayblanib, 2 yil muddatga ozodlikdan mahrum etildi. 

Tayinlangan jazo umumiy tartibli koloniyalarda o‘tash belgilandi. Jazoni o‘tash muddati 2023-yil 14-dekabrdan hisoblanadi.