Surxondaryo viloyatida o‘rmon xo‘jaligi xodimlari o‘z hududida huquqbuzarlik sodir etilishiga yo‘l qo‘ygani uchun javobgarlikka tortildi. Bu haqda viloyat Ekologiya boshqarmasi matbuot xizmati xabar berdi.
Ma’lum qilinishicha, Boysun tuman Ekologiya bo‘limiga kelib tushgan tezkor xabarlarga asosan Boysun davlat o‘rmon xo‘jaligi “Xomkon” bo‘limi o‘rganilgan. O‘rganish davomida mazkur bo‘lim xodimlarining o‘z ishiga sovuqqon munosabatda bo‘lganligi ortidan 4 tup o‘suvchanligini yo‘qotmagan “Zarafshon” archasi, 2 tup o‘suvchanligini yo‘qotgan “Zarafshon” archasi tag qismidan kesilgani, shuningdek, 43 tup archa daraxtlarining yon shoxlari kesilib, shikastlantirilgani aniqlangan.
Mazkur holat yuzasidan “Xomkon” o‘rmon bo‘limi xodimlarining har biriga nisbatan Maʼmuriy javobgarlik to‘g‘risidagi kodeksning 95-moddasi (tabiiy muhitni tiklash, tabiiy zaxiralarni qayta hosil qilish va tabiiy muhitga zararli ta’sir ko‘rsatish oqibatlarini bartaraf etish choralarini ko‘rmaganlik) 1-qismiga binoan maʼmuriy jarima qo‘llanilib, tabiatga yetkazilgan 21 million 583 ming so‘m zararni qoplash belgilangan.
Avvalroq Xorazmda o‘zini tadbirkor deb tanishtirgan shaxslar istirohat bog‘idagi daraxtlarni kesib tashlagandi. Buxoroda 22 tup qarag‘ay noqonuniy kesilib, tabiatga 144,3 million so‘mlik ziyon yetkazilgandi. Farg‘onadagi chegara posti yaqinida 12 tup manzarali daraxt qo‘porib tashlangani xabar qilingandi.
Izoh (0)