Sog‘liqni saqlash vazirligining tegishli buyrug‘i bilan Natalya Nadirxanova Respublika ixtisoslashtirilgan ona va bola salomatligi ilmiy-amaliy tibbiyot markazi direktori lavozimiga tayinlandi. Bu haqda SSV matbuot xizmati xabar berdi.
II darajali “Sog‘lom avlod uchun” ordeni sohibasi, tibbiyot fanlari doktori Natalya Nadirxanova 1993-yil Samarqand davlat tibbiyot institutini tamomlagan. Mehnat faoliyatini Buxoro shahar markaziy shifoxonasi tug‘uruq bo‘limida shifokor sifatida boshlagan.
U turli yillarda Respublika shoshilinch tibbiy yordam ilmiy markazi Buxoro filiali shoshilinch ginekologiya bo‘limi mudiri, Buxoro viloyat perinatal markazi direktori hamda Respublika ixtisoslashtirilgan akusherlik va ginekologiya ilmiy-amaliy tibbiyot markazi bosh shifokori, direktori kabi masʼul lavozimlarda ishlagan.
Prezidentning tegishli qaroriga ko‘ra, 2023-yil 1-oktyabrdan Respublika ixtisoslashtirilgan akusherlik va ginekologiya ilmiy-amaliy tibbiyot markazi, Aholi reproduktiv salomatligi markazi hamda Ona va bola skrining markazi negizida Respublika ixtisoslashtirilgan ona va bola salomatligi ilmiy-amaliy tibbiyot markazi tashkil etilgan edi.
Avvalroq O‘zbekistonda “Sog‘liqni saqlash loyihalari markazi” loyiha ofisi tashkil etilishi to‘g‘risida xabar berilgandi.
Izoh (0)