Соғлиқни сақлаш вазирлигининг тегишли буйруғи билан Наталья Надирханова Республика ихтисослаштирилган она ва бола саломатлиги илмий-амалий тиббиёт маркази директори лавозимига тайинланди. Бу ҳақда ССВ матбуот хизмати хабар берди.
II даражали “Соғлом авлод учун” ордени соҳибаси, тиббиёт фанлари доктори Наталья Надирханова 1993 йил Самарқанд давлат тиббиёт институтини тамомлаган. Меҳнат фаолиятини Бухоро шаҳар марказий шифохонаси туғуруқ бўлимида шифокор сифатида бошлаган.
У турли йилларда Республика шошилинч тиббий ёрдам илмий маркази Бухоро филиали шошилинч гинекология бўлими мудири, Бухоро вилоят перинатал маркази директори ҳамда Республика ихтисослаштирилган акушерлик ва гинекология илмий-амалий тиббиёт маркази бош шифокори, директори каби масъул лавозимларда ишлаган.
Президентнинг тегишли қарорига кўра, 2023 йил 1 октябрдан Республика ихтисослаштирилган акушерлик ва гинекология илмий-амалий тиббиёт маркази, Аҳоли репродуктив саломатлиги маркази ҳамда Она ва бола скрининг маркази негизида Республика ихтисослаштирилган она ва бола саломатлиги илмий-амалий тиббиёт маркази ташкил этилган эди.
Аввалроқ Ўзбекистонда “Соғлиқни сақлаш лойиҳалари маркази” лойиҳа офиси ташкил этилиши тўғрисида хабар берилганди.
Изоҳ (0)