Агар Будапешт шу ҳафта бўлиб ўтадиган ЕИ саммитида Киевга янги ёрдам пакетини блокласа, Европа Иттифоқи Венгрия иқтисодиётида муаммоларни юзага келтиради, деб ёзади Financial Times.
Нашрнинг ёзишича, Венгриянинг иқтисодий муаммоларидан, жумладан, ҳукумат камомади, юқори инфляция, заиф валюта ва Европа Иттифоқидаги энг юқори даражадаги қарз ажратиш бўйича стратегияни белгилаб берадиган махфий режа тузилган. Венгрия Украинага маблағ ажратиш қарорига вето қўйса, бу режа ишга туширилади.
Ҳужжатда таъкидланишича, “1 февралдаги саммитда келишув бўлмаса, бошқа давлат ва ҳукумат раҳбарлари Венгрия бош вазирининг конструктив бўлмаган хатти-ҳаракатлари сабабли ЕИ томонидан бу мамлакатга бошқа пул берилмаслигини очиқ эълон қилади”.
Венгриянинг Европа Иттифоқи ишлари бўйича вазири Янош Бока нашрга берган интервьюсида унинг мамлакати босимлардан қўрқмаслигини айтган.
Унинг сўзларига кўра, “Венгрия Украинани қўллаб-қувватлаш ва ЕИ маблағларини олиш ўртасида боғлиқлик кўрмайди ва бошқа томонларнинг бунга уринишларини ҳам рад этади”.
Ўтган йилнинг декабрь ойида бўлиб ўтган саммитда Европа Иттифоқи етакчилари Украинага кейинги молиявий ёрдам масаласида консенсусга эриша олмаган эди. Венгрия бош вазири Виктор Орбан саммитда ушбу мақсадлар учун маблағ ажратилишига тўсқинлик қилганини тасдиқлади.
“Керакли тайёргарликдан сўнг, 2024 йил бошида саммитда бу масалага қайтамиз”, — деб ёзганди у Х ижтимоий тармоғида.
Изоҳ (0)