Kamol Ikromov O‘zbekistonning Dubaydagi bosh konsuli etib tayinlandi. Bu haqda “Dunyo” AA xabar qildi.
Ma’lum qilinishicha, u BAA Tashqi ishlar vazirligining Dubay bo‘limi direktori Shayx Maktum bin Butti Al Maktum bilan uchrashdi va konsullik patentini qabul qilib oldi. Shayx Al Maktum yangi tayinlangan bosh konsulni amirliklardagi diplomatik missiyasining boshlanishi bilan samimiy tabrikladi va uning diplomatik faoliyatida muvaffaqiyat tiladi.
Suhbat chog‘ida O‘zbekiston va BAA o‘rtasidagi ikki tomonlama munosabatlarning bugungi holati va uni rivojlantirish istiqbollari muhokama qilindi. Iqtisodiyot, savdo, sarmoya, yuqori texnologiyalar, innovatsiyalar, sanoat kooperatsiyasi, qishloq xo‘jaligi, energetika, transport, turizm, fan va madaniyat sohalarida o‘zaro hamkorlikni yanada chuqurlashtirish istiqbollari xususida fikr almashildi.
Tomonlar O‘zbekiston va BAA fuqarolarini o‘zaro viza talablaridan ozod qilish to‘g‘risidagi bitim imzolangani so‘nggi yillarda ikki davlat erishgan o‘zaro anglashuvning yuksak darajasi va hamkorlikni yanada rivojlantirishdan manfaatdorlikning tasdig‘i ekanligi qayd etildi.
Kamol Ikromov 44 yoshda. U Dubayga bosh konsul eytib tayinlanishidan avval 2018—2023-yillarda O‘zbekistonning Nyu-York shahridagi bosh konsuli bo‘lib ishlagan. U O‘zbekistonning Dubaydagi bosh konsulligiga 2019—2024-yillarda rahbarlik qilgan Alisher Salomov o‘rniga tayinlandi.
Izoh (0)