Namangan viloyatining Kosonsoy tumanida tezkor tadbir bahonasida bankdan katta miqdorda pul olib, qochib ketgan sobiq ish boshqaruvchi qamoqqa olindi. Bu haqda Platina xabar berdi.
Ma’lum qilinishicha, “Xalq banki” ATB Kosonsoy tuman filiali ish boshqaruvchisi lavozimida ishlagan K.Q.V. soxta tezkor tadbir uchun pul kerakligini aytib, o‘z ishxonasidan katta miqdordagi pullarni olib chiqib ketgan.
U 2023-yil 9-avgustda ishdan olingan, ammo filial bosh hisobchisi va kassa mudiri bilan oldindan til biriktirib, 17-avgust kuni kassa omboriga birgalikda kirgan. Ular go‘yoki departamentning Kosonsoy tumani bo‘limi xodimlari tomonidan tezkor tadbir o‘tkazilayotganini, tadbirda foydalanish uchun pul kerakligini aytgan.
Shu tariqa kassa omboridan 137 ming AQSH dollari va 1,2 milliard so‘m pulni chiqim orderi rasmiylashtirgan holda qo‘lga kiritib, pul mablag‘laridan hech qanday tadbirda foydalanmasdan, ishonib topshirilgan yoki ularning ixtiyorida bo‘lgan o‘zganing mulkini o‘zlashtirish va rastrata qilish yo‘li bilan talon-toroj qilgan.
Jinoyat ishlari bo‘yicha Kosonsoy tumani sudining 2023-yil 18-avgustdagi ajrimiga asosan sirtdan qamoqqa olish tarzidagi ehtiyot chorasi qo‘llangan. 19-avgust kuni u Qirg‘izistonda ushlanib, 2024-yil 16-yanvar kuni O‘zbekistonga olib kelingan. 2024-yil 19-yanvar kuni Jinoyat-protsessual kodeksining 221-moddasi tartibida ushlangan.
Mazkur holat yuzasidan K.Q.V. 2023-yil 18-avgust kuni Jinoyat kodeksining 167-moddasi 3-qismi “a” bandi (juda ko‘p miqdorda o‘zlashtirish yoki rastrata yo‘li bilan talon-toroj qilish) bilan sirtdan ayblanuvchi tariqasida ishga jalb qilingan.
2024-yil 20-yanvardagi sud ajrimiga ko‘ra, unga nisbatan qamoqqa olish tarzidagi ehtiyot chorasi qo‘llangan.
Izoh (0)