Afg‘onistonda halokatga uchragan Rossiyaning Falcon 10 samolyotidan mo‘jizaviy tarzda omon qolgan ekipaj a’zolari Moskvaga qaytib keldi va ilk bor jurnalistlarga aviahalokat tafsilotlarini aytib berdi, deb yozmoqda “Izvestiya”.
Voqea ishtirokchilaridan biri Arkadiy Grachev fojiali voqea tafsilotlari bilan o‘rtoqlashdi. Uning so‘zlariga ko‘ra, ekipaj samolyotni tog‘ cho‘qqisiga qo‘ndirishga qiynalgan.
“Urinishlarimiz natijasida samolyotni qo‘ndirishga muvaffaq bo‘ldik. Biz tog‘ cho‘qqisiga qo‘ndik. Texnik muammolar bor edi. Bir yarim kun sovuqda o‘tirdik, keyin shifokorlar bizni olib ketishdi. To‘rt ming metr balandlikdan, qalin qorni kechib, qishloqqa besh soatcha yo‘l yurdik”, — dedi Grachev.
Uchuvchining aytishicha, ekipaj a’zolari yuqoridan qishloqni ko‘rgan va yordam so‘rab u yerga borishga qaror qilgan. Uzoq vaqt davomida samolyotni hech kim qidirmagan, chunki uning joyini aniqlay olishmagan. Avariya mayog‘i ishlagan, lekin negadir uchoq joylashgan joy topilmagan.
Uchuvchining so‘zlariga ko‘ra, Afg‘oniston xalqi yaralangan rossiyalik uchuvchilarga iliq munosabatda bo‘lgan va kasalxonaga uyda tayyorlangan taomlarni olib kelgan.
Rossiyaning Falcon 10 samolyoti 20-yanvar kuni radarlardan g‘oyib bo‘ldi va ertasi kuni Afg‘onistonda halokatga uchragani ma’lum qilindi. Bortda omon qolgan to‘rt nafar ekipaj a’zosi va keyinchalik vafot etgan er-xotin zudlik bilan Moskvaga olib ketildi. Avvalroq afg‘on ommaviy axborot vositalari voqea joyidan olingan kadrlar va tirik qolgan uchuvchilarning suratlarini chop etgandi.
Izoh (0)