Afg‘onistonda halokatga uchragan Falcon 10 biznes-jeti uchuvchisi Arkadiy Grachev va uning rafiqasiga ayblov e’lon qilindi. Ularni 10 yilgacha qamoq jazosi kutmoqda. Bu haqda Mash Telegram kanali xabar berdi.
Ma’lum bo‘lishicha, halokatga uchragan samolyotga egalik qilgan “Atletik grupp” uchuvchining rafiqasi Yekaterina Agapovaga tegishli. Biroq kompaniya hech qachon yo‘lovchi tashish bilan shug‘ullanmagan va litsenziyaga ega bo‘lmagan. Samolyot “Atletik grupp” kompaniyasiga tegishli, biroq parvozlar boshqa kompaniya — “Jet Aero” orqali amalga oshirilgan.
“Arkadiy Grachev va uning rafiqasi 10 yilgacha qamoq jazosiga hukm qilinishi mumkin”, — deyiladi xabarda.
Aviahalokatning ehtimoliy sabablari qatoridan samolyot bortida yonilg‘i yetishmasligi, kuchli shamol va qor bo‘roni joy olgan. Yonilg‘i quyish vaqtida uni hisoblashda xatolar bo‘lgani aytilmoqda.
“Aviahalokatning turli xil versiyalari ko‘rib chiqilmoqda, ustuvorliklardan biri dvigatelning ishdan chiqishi ko‘rinishidagi texnik sabablardir”, — deydi Rossiya Tergov qo‘mitasi.
Bortda tibbiy guruh, ikki uchuvchi, tadbirkor Anatoliy va Anna Yevsyukovlar bo‘lgan. Ular Tailanddan qaytish uchun Falcon-10 samolyotini ijaraga olgan, sababi Annada noma’lum infeksiya aniqlangan. Aviatexnika Gaya—Toshkent—Moskva yo‘nalishida harakatlanishi kerak edi.
Falcon-10 biznes-jeti 21-yanvar kuni Afg‘oniston tog‘larida halokatga uchragan. Oqibatda bortda bo‘lgan Anatoliy va Anna Yevsyukovlar halok bo‘lgan. Afg‘onistonlik qutqaruvchilar to‘rt kishini tirik topgan. Omon qolganlar Kobuldagi harbiy tibbiyot majmuasiga yetkazilgan.
Izoh (0)