Афғонистонда ҳалокатга учраган Россиянинг Falcon 10 самолётидан мўжизавий тарзда омон қолган экипаж аъзолари Москвага қайтиб келди ва илк бор журналистларга авиаҳалокат тафсилотларини айтиб берди, деб ёзмоқда “Известия”.
Воқеа иштирокчиларидан бири Аркадий Грачев фожиали воқеа тафсилотлари билан ўртоқлашди. Унинг сўзларига кўра, экипаж самолётни тоғ чўққисига қўндиришга қийналган.
“Уринишларимиз натижасида самолётни қўндиришга муваффақ бўлдик. Биз тоғ чўққисига қўндик. Техник муаммолар бор эди. Бир ярим кун совуқда ўтирдик, кейин шифокорлар бизни олиб кетишди. Тўрт минг метр баландликдан, қалин қорни кечиб, қишлоққа беш соатча йўл юрдик”, — деди Грачев.
Учувчининг айтишича, экипаж аъзолари юқоридан қишлоқни кўрган ва ёрдам сўраб у ерга боришга қарор қилган. Узоқ вақт давомида самолётни ҳеч ким қидирмаган, чунки унинг жойини аниқлай олишмаган. Авария майоғи ишлаган, лекин негадир учоқ жойлашган жой топилмаган.
Учувчининг сўзларига кўра, Афғонистон халқи яраланган россиялик учувчиларга илиқ муносабатда бўлган ва касалхонага уйда тайёрланган таомларни олиб келган.
Россиянинг Falcon 10 самолёти 20 январь куни радарлардан ғойиб бўлди ва эртаси куни Афғонистонда ҳалокатга учрагани маълум қилинди. Бортда омон қолган тўрт нафар экипаж аъзоси ва кейинчалик вафот этган эр-хотин зудлик билан Москвага олиб кетилди. Аввалроқ афғон оммавий ахборот воситалари воқеа жойидан олинган кадрлар ва тирик қолган учувчиларнинг суратларини чоп этганди.
Изоҳ (0)