Словакия Еврокомиссиянинг Украинани 2024-2027 йиллар давомида тўрт йиллик муддатга қўллаб-қувватлаш учун 50 миллиард евролик Украина жамғармасини яратиш таклифини қўллаб-қувватлайди.
Бу ҳақда Украина бош вазири Денис Шмигал Словакия бош вазири Роберт Фицо билан учрашув якунлари бўйича баёнотда маълум қилди.
Хусусан, Шмигалнинг аниқлик киритишича, улар Фицо билан биргаликда бир қатор масалалар бўйича келишувга эришишга муваффақ бўлишган.
“Словакия Европа Иттифоқи томонидан Украинага 50 миллиард евро ажратишни назарда тутувчи Ukraina Facility дастурини қўллаб-қувватлайди”, — деди Шмигал.
Бундан ташқари, Украина бош вазири таъкидлаганидек, Фицо Украинанинг Европа интеграциясига интилишларини тўлиқ қўллаб-қувватлашини маълум қилган.
“Словакия ҳукумати Украинанинг мамлакат корхоналаридан қурол ва ўқ-дорилар сотиб олишига тўсқинлик қилмайди”, — деб таъкидлади Шмигал.
“Украина ва Словакия мамлакатларимиз хавфсизлиги ва фаровонлиги йўлида самарали ҳамкорликни давом эттиради”, — дея қўшимча қилди Вазирлар маҳкамаси раҳбари.
Украина ҳукумати раҳбарининг сўзларига кўра, Украина ушбу оғир дамларда ёрдам бераётган словак халқидан миннатдор.
Учрашув давомида, шунингдек, Словакиянинг Украинани миналардан тозалашда иштирок этиши муҳимлиги тасдиқланди. Бундан ташқари, Фицо Украина президенти Владимир Зеленскийнинг Тинчлик формуласини қўллаб-қувватлашини билдирди.
Изоҳ (0)