Jinoyat ishlari bo‘yicha Yakkasaroy tuman sudida taksichini o‘ldirgan 24 yoshli sudlanuvchiga hukm o‘qildi. Bu haqda sudda ishtirok etgan “Daryo” jurnalisti xabar berdi.
Sudda aniqlashtirilishicha, sudlanuvchi mijoz sifatida taksi chaqirib, haydovchining yonidagi puli va qimmatbaho buyumlarini o‘zlashtirishga uringan. Biroq qotillik qodir etilgan joyga boshqa mashinaning kelib to‘xtagani tufayli niyatini yakuniga yetkazolmagan. Natijada qotillikka qo‘l urgan yigit voqea joyidan qochib ketgan.
Bildirilishicha, qotillik 2023-yilning 21-avgust kuni soat 22:00 larda Mirzo Ulug‘bek tumanining “Feruza” mahallasida sodir bo‘lgan.
Marhum 23 yoshli T.B. o‘z boshqaruvidagi qora rangli Malibu-2 rusumli avtomashinasida “Yandeks Go” internet ilovasi orqali taksi xizmatini ko‘rsatgan. Navbatdagi mijozlardan biri uni Sergeli tumaniga chaqirib, taksi yordamida Mirzo Ulug‘bek tumanining “Feruza” mahallasiga yetib borgan. Voqea joyida hech qanday sababsiz taksi haydovchisini pichoqlab, voqea joyidan yashiringan.
Ko‘rsatilgan tibbiy muolajalarga qaramasdan haydovchi og‘ir tan jarohatlari oqibatida shifoxonada vafot etgan.
Sud-tibbiyot ekspertizasi xulosasiga ko‘ra, taksi haydovchisining o‘limiga chap o‘pka va jigar jarohatlanishi, ko‘krak qafasining orqa yuzasidan teshib kirgan sanchib-kesilgan jarohatlar oqibatida ichki qon ketishidan yuz berganligi sabab bo‘lgan. Ekspertlar fikricha, jarohatlar o‘tkir sanchib-kesuvchi jism ta’sirida hosil bo‘lgan.
Jinoyat ishlari bo‘yicha Yakkasaroy tuman sudi sudyasi Fozil Abdushukurov raisligidagi sudlov hay’ati qotillik jinoyatini sodir etgani aytilgan sudlanuvchini Jinoyat kodeksining 97-moddasi “v”, “j”, “i” bandlari (tamagirlik niyatida aybdorga ayon bo‘lgan ojiz ahvoldagi shaxsni o‘ta shafqatsizlik bilan o‘ldirish) 164-moddasi 3-qismi “g” bandi (badanga og‘ir shikast yetkazgan holda bosqinchilik qilish) bandi bilan aybdor deb topib, uni 18 yilga ozodlikdan mahrum qildi.
Izoh (0)