Жиноят ишлари бўйича Яккасарой туман судида таксичини ўлдирган 24 ёшли судланувчига ҳукм ўқилди. Бу ҳақда судда иштирок этган “Дарё” журналисти хабар берди.
Судда аниқлаштирилишича, судланувчи мижоз сифатида такси чақириб, ҳайдовчининг ёнидаги пули ва қимматбаҳо буюмларини ўзлаштиришга уринган. Бироқ қотиллик қодир этилган жойга бошқа машинанинг келиб тўхтагани туфайли ниятини якунига етказолмаган. Натижада қотилликка қўл урган йигит воқеа жойидан қочиб кетган.
Билдирилишича, қотиллик 2023 йилнинг 21 август куни соат 22:00 ларда Мирзо Улуғбек туманининг “Феруза” маҳалласида содир бўлган.
Марҳум 23 ёшли Т.Б. ўз бошқарувидаги қора рангли Malibu-2 русумли автомашинасида Yandex Gо интернет иловаси орқали такси хизматини кўрсатган. Навбатдаги мижозлардан бири уни Сергели туманига чақириб, такси ёрдамида Мирзо Улуғбек туманининг “Феруза” маҳалласига етиб борган. Воқеа жойида ҳеч қандай сабабсиз такси ҳайдовчисини пичоқлаб, воқеа жойидан яширинган.
Кўрсатилган тиббий муолажаларга қарамасдан ҳайдовчи оғир тан жароҳатлари оқибатида шифохонада вафот этган.
Суд-тиббиёт экспертизаси хулосасига кўра, такси ҳайдовчисининг ўлимига чап ўпка ва жигар жароҳатланиши, кўкрак қафасининг орқа юзасидан тешиб кирган санчиб-кесилган жароҳатлар оқибатида ички қон кетишидан юз берганлиги сабаб бўлган. Экспертлар фикрича, жароҳатлар ўткир санчиб-кесувчи жисм таъсирида ҳосил бўлган.
Жиноят ишлари бўйича Яккасарой туман суди судьяси Фозил Абдушукуров раислигидаги судлов ҳайъати қотиллик жиноятини содир этгани айтилган судланувчини Жиноят кодексининг 97-моддаси “в”, “ж”, “и” бандлари (тамагирлик ниятида айбдорга аён бўлган ожиз аҳволдаги шахсни ўта шафқатсизлик билан ўлдириш) 164-моддаси 3-қисми “г” банди (баданга оғир шикаст етказган ҳолда босқинчилик қилиш) банди билан айбдор деб топиб, уни 18 йилга озодликдан маҳрум қилди.
Изоҳ (0)