Qashqadaryo viloyati Shahrisabz tumanida alkogol mahsulotlari ishlab chiqarayotgan yashirin sex aniqlandi, deb xabar beradi Bosh prokuratura huzuridagi departament.
Ma’lum qilinishicha, departamentning Shahrisabz tuman bo‘limi tomonidan IIB xodimlari bilan hamkorlikda isteʼmolga yaroqsiz alkogolli ichimliklarni muomalaga kiritilishining oldini olish maqsadida tezkor tadbir o‘tkazilgan. Tadbirda “Yangibog‘” MFYda yashovchi N.Y. o‘z uyida yashirin sex tashkil qilib, qo‘lbola usulda alkogol mahsulotlari ishlab chiqarayotgani aniqlangan. Ushbu xonadondan 1 215 dona qalbaki aksiz marka, 242 dona alkogol, 140 litr spirt, 250 dona QR-kod markirovka, 1 000 dona bo‘sh shisha idish, qadoqlash uskunalari va boshqa ishlab chiqarishda foydalanilgan tovar moddiy boyliklar ashyoviy dalil sifatida olingan.
Mazkur holat yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) va 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishi qo‘zg‘atilib, tergov harakatlari o‘tkazilmoqda.
Shuningdek, departamentning Shahrisabz tuman bo‘limi tomonidan IIB xodimlari bilan hamkorlikda o‘tkazilgan tezkor tadbirda fuqaro M.T. o‘z uyining yordamchi xo‘jaligida yashirin sex tashkil qilib, isteʼmolga yaroqsiz yog‘ mahsulotlari ishlab chiqarayotganligi aniqlanib, 410 litr qo‘lbola yog‘, 522 kg chigit, 4 dona elektr dvigatel, juvoz uskunasi va boshqa ishlab chiqarishda foydalanilgan tovar moddiy boyliklar ashyoviy dalil sifatida olingan.
Avvalroq Xorazmda 422 million so‘mlik aksiz markasiz tamaki mahsulotlari aniqlangani, Navoiy va Buxoroda 600 mln so‘mlik qalbaki aksiz markali alkogol mahsulotlari savdosining oldi olingani to‘g‘risida xabar berilgandi.
Izoh (0)