Oliy Majlis Senatining qirq to‘qqizinchi yalpi majlisida “O‘zbekiston Respublikasining ayrim qonun hujjatlariga O‘zbekiston milliy qonunchiligini JST bitimlariga muvofiqlashtirishni nazarda tutuvchi o‘zgartirish va qo‘shimchalar kiritish to‘g‘risida”gi qonun ko‘rib chiqildi.
Qonunda intellektual mulk, reklama va davlat boji bilan bog‘liq bo‘lgan milliy qonunchilikning qator normalarini Jahon savdo tashkilotining talablariga uyg‘unlashtirish maqsadida “Ixtirolar, foydali modellar va sanoat namunalari to‘g‘risida”gi, “Tovar belgilari, xizmat ko‘rsatish belgilari va tovar kelib chiqqan joy nomlari to‘g‘risida”gi, “Reklama to‘g‘risida”gi, “Dori vositalari va farmatsevtika faoliyati to‘g‘risida”gi va “Davlat boji to‘g‘risida”gi qonunlarga o‘zgartirish va qo‘shimchalar kiritilishi nazarda tutilgan.
Oliy Majlis Senati raisi Tanzila Norboyevaning ma’lum qilishicha, JSTga qo‘shilish mamlakatning iqtisodiy siyosatining asosiy mo‘ljallaridan biridir.
Bu boradagi islohotlarni huquqiy jihatdan ta’minlash maqsadida milliy qonunchiligimiz Jahon savdo tashkiloti bitimlariga muvofiqlashtirilmoqda.
Qonunlarga kiritilayotgan o‘zgartirish va qo‘shimchalar O‘zbekistonning JSTga a’zo bo‘lish jarayonining jadallashishiga hamda intellektual mulk obyektlarining himoya qilinishini ta’minlashga, mamlakatimizdagi sarmoyadorlar va xorijiy investorlarga bir xil shart-sharoitlar hamda teng raqobat muhitini yaratadi.
Mazkur hujjat muhim qadam bo‘lib, ushbu tashkilotga a’zo bo‘lish yo‘lidagi sa’y-harakatlarimizni yanada faollashtiradi, — dedi senat raisi.
Avvalroq Norboyeva bugungi murakkab davrda O‘zbekistonda hech kimga qaram bo‘lmaydigan iqtisodni rivojlantirishga qaratilgan mustaqil siyosat olib borilayotganini urg‘ulagan edi.
Izoh (0)