Navoiyga Xitoydan 60 ta avtobus sotib olish bo‘yicha Yutong kompaniyasi vakillari bilan shartnoma imzolandi. Bu haqda viloyat hokimligi matbuot xizmati xabar berdi.
Ayni paytda Navoiy viloyatiga xitoylik investorlarni jalb etish, viloyatning investitsion salohiyatini namoyish qilish hamda ishlab chiqarilayotgan mahsulotlarni eksport qilish maqsadida viloyat rahbari Normat Tursunov boshchiligidagi delegatsiya Xitoyda xizmat safarida bo‘lib turibdi. Safar 26-yanvargacha davom etishi rejalashtirilgan.
Safarning ilk kunida delegatlar hamda Shenjon-Teyjun ishbilarmonlar uyushmasi raisi Lin Ching ishtirokida uchrashuv tashkil etildi. Uchrashuvda xitoylik investorlarning Navoiy viloyatiga qiziqishi baland ekanligi alohida taʼkidlandi.
Xususan, Navoiy viloyatida sanoat zonasini tashkil etish, qurilish, turizm, transport infratuzilmasini rivojlantirish yo‘nalishlarida muzokaralar olib borildi. Bugungi kunda yo‘l-transport infratuzilmasini rivojlantirish sohasida ishlar sifatini oshirish, turizm sohasi va aholiga sifatli va qulay transport xizmatlarini ko‘rsatish juda muhim.
Shu bois, muzokaralar davomida Navoiy shahrida jamoat transporti yo‘nalishlari tarmog‘ini kengaytirish va harakat tarkibini zamonaviy, ekologik toza avtobuslar bilan yangilash maqsadida Yutong kompaniyasi vakillari bilan 60 ta avtobus xaridi yuzasidan shartnoma imzolandi.
Izoh (0)