Turkmaniston bosh prokurori Serdar Malikguliyev o‘z lavozimidan ozod etildi. Mamlakat prezidenti Serdar Berdimuhamedov uning ishdan bo‘shatilishi sababini “o‘z xizmat vazifalarini lozim darajada bajarmagani va prokuratura ishini tashkil etish darajasi pastligi” bilan izohladi, deb yozmoqda “Oltin asr”.
Davlat rahbari o‘z qarorini Davlat xavfsizlik kengashi yig‘ilishida Malikguliyevning prokuratura organlarining 2023-yildagi faoliyati to‘g‘risidagi hisobotini tinglaganidan keyin ma’lum qildi. Ishdan bo‘shatilgan bosh prokuror bu lavozimda 2022-yil 5-iyuldan beri faoliyat yuritib kelayotgan edi, u avval Ashxobod prokurori bo‘lib ishlagan, deb eslatdi turkman OAV.
Turkmanistonning yangi bosh prokurori etib 3-darajali davlat adliya maslahatchisi Begmurat Muhamedov tayinlandi. U “Harbiy qasamyodga sodiqlik, Vatanga abadiy sadoqat, xalqning tinch va bunyodkorlik hayoti qorovulida fidokorona turishga tayyorlik belgisi sifatida” tantanali qasamyod qildi va davlat bayrog‘ining chetidan o‘pdi.
Serdar Berdimuhamedov Muhamedovga qonunlar ijrosi va normativ-huquqiy hujjatlarning qonuniyligi ustidan qat’iy nazoratni ta’minlash, fuqarolarning huquq va erkinliklarini himoya qilish, quyi tuzilmalarning moddiy-texnik bazasini mustahkamlash va prokurorlarning turmush sharoitini yaxshilash bo‘yicha topshiriqlar berdi.
Izoh (0)