Туркманистон бош прокурори Сердар Маликгулиев ўз лавозимидан озод этилди. Мамлакат президенти Сердар Бердимуҳамедов унинг ишдан бўшатилиши сабабини “ўз хизмат вазифаларини лозим даражада бажармагани ва прокуратура ишини ташкил этиш даражаси пастлиги” билан изоҳлади, деб ёзмоқда “Олтин аср”.
Давлат раҳбари ўз қарорини Давлат хавфсизлик кенгаши йиғилишида Маликгулиевнинг прокуратура органларининг 2023 йилдаги фаолияти тўғрисидаги ҳисоботини тинглаганидан кейин маълум қилди. Ишдан бўшатилган бош прокурор бу лавозимда 2022 йил 5 июлдан бери фаолият юритиб келаётган эди, у аввал Ашхобод прокурори бўлиб ишлаган, деб эслатди туркман ОАВ.
Туркманистоннинг янги бош прокурори этиб 3-даражали давлат адлия маслаҳатчиси Бегмурат Муҳамедов тайинланди. У “Ҳарбий қасамёдга содиқлик, Ватанга абадий садоқат, халқнинг тинч ва бунёдкорлик ҳаёти қоровулида фидокорона туришга тайёрлик белгиси сифатида” тантанали қасамёд қилди ва давлат байроғининг четидан ўпди.
Сердар Бердимуҳамедов Муҳамедовга қонунлар ижроси ва норматив-ҳуқуқий ҳужжатларнинг қонунийлиги устидан қатъий назоратни таъминлаш, фуқароларнинг ҳуқуқ ва эркинликларини ҳимоя қилиш, қуйи тузилмаларнинг моддий-техник базасини мустаҳкамлаш ва прокурорларнинг турмуш шароитини яхшилаш бўйича топшириқлар берди.
Изоҳ (0)