Telegram messenjeridagi kanallarda Toshkent shahrining Sergeli tumanidagi do‘konlarda yong‘in sodir bo‘lgani xabar berilib, uning oqibati ko‘ringan tasvirlar ham paydo bo‘ldi. “Daryo” jurnalisti voqea joyiga borib, holatga aniqlik kiritganida yong‘in sabab 5 ta do‘kon yongani ma’lum bo‘ldi.
15-yanvar kuni soat 14:56 da Toshkent shahar Favqulodda vaziyatlar boshqarmasiga Yangihayot tumanining Qanora ko‘chasida joylashgan, yengil konstruksiyadan qurilgan do‘konlarda yong‘in chiqqani to‘g‘risida xabar kelib tushdi. Xabarga asosan 4 ta yong‘in qutqaruv ekipaji soat 15:01 da voqea joyiga yetib borib, soat 15:05 da yong‘in to‘liq o‘rab olindi. Soat 15:12 da yong‘in batamom o‘chirildi. Yong‘in natijasida tan jarohati olgan va vafot etgan fuqarolar yo‘q, — deydi bu haqda “Daryo”ga ma’lumot bergan Toshkent shahar Favqulodda vaziyatlar boshqarmasi axborot xizmati rahbari, kapitan Zuhriddin Qurbonov.
Mas’ulning bildirishicha, ayni vaqtda yong‘inning kelib chiqish sababi va zarar miqdori o‘rganilmoqda.
Aniqlanishicha, yong‘in sabab hududdagi 5 ta do‘kon — qurilish va xo‘jalik mollari do‘konlari, velosiped ta’mirlovchi ustaxona hamda tez pishar taomlar tayyorlovchi oshxonaga zarar yetgan.
-tlxVRXxD.jpg)
Uchta do‘koni yonganini aytayotgan tadbirkor Nasriddin Nurmatov yong‘in sabab taxminan 500 million so‘m miqdorida zarar ko‘rganini bildirdi.
To‘rtinchi “magazin”dan chiqib, yuqoridan ko‘tarilib borgan. Zo‘rg‘a hujjatlarni chiqarib qoldik, deyishdi. Olov juda tez kelgan. Hech narsani sezmay qolishgan. Yong‘in chiqqani aytilayotgan do‘kon bo‘sh edi. Ichida hech narsa yo‘q edi. Taxminan uchala do‘konimda 500 million so‘mlik tovarlar bor edi, — deydi u.
Izoh (0)