Samarqand viloyatida kuchli shamol esishi natijasida ayrim elektr tarmoqlari xavfsizlikni ta’minlash maqsadida o‘chirildi. Bu haqda Energetika vazirligi matbuot xizmati xabar berdi.
Qayd etilishicha, buning natijasida Urgut, Past Darg‘om, Samarqand tumanlari hamda Samarqand shahri iste’molchilari qisman (12 500 ta) elektr ta’minotidan uzilgan.
“Kuchli shamol esishi to‘xtagach, elektr energiyasi yetkazib berilishi ta’minlanadi”, — deyiladi xabarda.
Avvalroq “O‘zgidromet” Toshkent, Samarqand, Jizzax va Sirdaryo viloyatlarida shamol g‘arbdan 7-12 metr/sekund tezlikda esishi, baʼzi joylarda 15-20 metr/sekundgacha kuchayishi, ayrim joylarda chang-to‘zonlar bilan kuzatilishi mumkinligi to‘g‘risida xabar bergandi.
Izoh (0)