Тошкент шаҳри ва Наманган вилоятида электр тармоқларига ноқонуний уланиш ҳолатлари фош этилмоқда, деб хабар беради Бош прокуратура ҳузуридаги департамент.
Маълум қилинишича, департаментнинг Наманган туман бўлими томонидан ЭТК ходимлари билан ҳамкорликда терговга қадар текширув ўтказилган. Текширув давомида “М.Л.” МЧЖни норасмий бошқариб келган Ж.С. ва бошқалар МЧЖ тош майдалаш цехининг электр ҳисоблагичига ташқи таъсир ўтказиб, жами 483,9 миллион сўмлик электр энергиясидан ноқонуний фойдалангани аниқланган.
Шу каби, департаментнинг Тошкент шаҳар бошқармаси томонидан ўтказилган терговга қадар текширувда “У.” МЧЖ техник бўлими масъул шахслари ва бошқалар “Қорақамиш деҳқон бозори” ҳудудидаги бино устига ўрнатилган алоқа қурилмасини умумий фойдаланишдаги электр тармоғига тижорат мақсадида улаб, жами 185,1 миллион сўмлик электр энергиясидан ноқонуний фойдалангани маълум бўлди.
Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Ўзбекистонда декабрь ойининг 15 кунида айрим истеъмолчиларнинг электр энергияси ва табиий газдан ноқонуний фойдаланиши натижасида давлат манфаатларига 73 миллиард 274 миллион сўмлик зарар етказилгани тўғрисида хабар берилганди.
Изоҳ (0)