Qo‘qondagi qandolatchilik korxonasida mayning ferma tashkil qilingani aniqlandi

Qo‘qondagi qandolatchilik korxonasida mayning ferma tashkil qilingani aniqlandi. Bu haqda “Hududiy elektr tarmoqlari” matbuot xizmati xabar berdi.

“Farg‘ona hududiy elektr tarmoqlari korxonasi”, “O‘zenergoinspeksiya” viloyat boshqarmasi hamda tegishli tashkilotlar xodimlari hamkorligida o‘tkazilgan navbatdagi reyd davomida, Qo‘qon shahrining “Marg‘ilon darvozasi” mahalla fuqarolar yig‘ini Sharqobod ko‘chasida qandolatchilik mahsulotlarini ishlab chiqaruvchi korxonada fuqaro A.A. tomonidan o‘zboshimchalik bilan elektr hisoblagichga tashqi ta’sir ko‘rsatgan holda mayning qurilmalarini to‘g‘ridan to‘g‘ri elektr tarmog‘iga ulab, noqonuniy ravishda foydalanib kelayotgani aniqlangan.

Dastlabki hisob-kitoblarga ko‘ra, A.A. tomonidan “Farg‘ona hududiy elektr tarmoqlari korxonasi” AJ manfaatiga 900 million so‘mdan ortiq (shundan mayning faoliyati uchun 800 million so‘mga yaqin) zarar yetkazilgani aniqlangan.

Iste’mol qilgan elektr energiyasining mayning faoliyatini yuritishda foydalangan qismi uchun amaldagi qonunchilkka ko‘ra tarifga 5 barobar o‘suvchi koeffitsiyent qo‘llanilib, jami 4 milliard so‘mlik qoidabuzarlik dalolatnomasi rasmiylashtirilgan.

Bosh prokuratura matbuot xizmatining ma’lum qilinishicha, holat yuzasidan “B.M.” oilaviy korxonasi rahbari A.A. nisbatan Jinoyat kodeksining 169-moddasi 4-qismi “a” bandi (juda ko‘p miqdorda o‘g‘rilik) bilan jinoyat ishi qo‘zg‘atilib, gumon qilinuvchi shaxs protsessual tartibda ushlangan.

Hozirda tegishli tashkilotlar tomonidan mazkur holat yuzasidan o‘rganish ishlari olib borilmoqda.