Ekvador prezidenti Daniel Noboa uning mamlakati zo‘ravonliklar avj olgan bir paytda 130 dan ortiq qamoqxona qo‘riqchisini garovda ushlab turgan narkotik to‘dalarga qarshi urush holatida ekanini aytdi. Bu haqda Deutsche Welle xabar berdi.
Noboa yangi qamoqxonalar qurish va chet ellik mahbuslarni deportatsiya qilish niyatida. Ekvadorda 20 000 ga yaqin jinoiy to‘da a’zolari faoliyat yuritadi.
“Biz urush holatidamiz va bu terroristik guruhlar oldida taslim bo‘la olmaymiz”, — deydi Ekvador prezidenti.
Ekvador politsiyasi televideniyega bostirib kirgan 70 nafar jinoiy to‘da a’zolari hibsga olinganini aytdi, biroq rasmiylar 9-yanvar kuni o‘g‘irlab ketilgan deb hisoblagan to‘rt nafar politsiyachi hamon asirlikda ekanini aytmoqda.
“Biz barcha garovga olinganlarni qaytarib olish uchun qattiq harakat qilmoqdamiz. Ularni sog‘-salomat qaytarish uchun qo‘limizdan kelganini va imkoni bo‘lmagan hamma narsani qilyapmiz”, — dedi Noboa.
Eslatib o‘tamiz, 7-yanvar kuni Ekvadorda 34 yillik qamoq jazosiga hukm qilingan Fito nomi bilan tanilgan “Los Choneros” jinoiy guruhi yetakchisi qamoqdan qochib ketganidan so‘ng vaziyat keskin yomonlashdi. Natijada bir qancha qamoqxonalarda tartibsizliklar yuzaga keldi. Mamlakat hukumati favqulodda holat e’lon qildi va komendantlik soati joriy etdi.
Ekvador prezidenti Daniel Noboa mamlakatda ichki qurolli mojaro boshlanganini e’lon qildi. 10-yanvarga o‘tar kechasi qurolli to‘dalar mamlakatda tartibsizliklar sodir etdi.
Izoh (0)