Эквадор президенти Даниэль Нобоа унинг мамлакати зўравонликлар авж олган бир пайтда 130 дан ортиқ қамоқхона қўриқчисини гаровда ушлаб турган наркотик тўдаларга қарши уруш ҳолатида эканини айтди. Бу ҳақда Deutsche Welle хабар берди.
Нобоа янги қамоқхоналар қуриш ва чет эллик маҳбусларни депортация қилиш ниятида. Эквадорда 20 000 га яқин жиноий тўда аъзолари фаолият юритади.
“Биз уруш ҳолатидамиз ва бу террористик гуруҳлар олдида таслим бўла олмаймиз”, — дейди Эквадор президенти.
Эквадор полицияси телевидениега бостириб кирган 70 нафар жиноий тўда аъзолари ҳибсга олинганини айтди, бироқ расмийлар 9 январь куни ўғирлаб кетилган деб ҳисоблаган тўрт нафар полициячи ҳамон асирликда эканини айтмоқда.
“Биз барча гаровга олинганларни қайтариб олиш учун қаттиқ ҳаракат қилмоқдамиз. Уларни соғ-саломат қайтариш учун қўлимиздан келганини ва имкони бўлмаган ҳамма нарсани қиляпмиз”, — деди Нобоа.
Эслатиб ўтамиз, 7 январь куни Эквадорда 34 йиллик қамоқ жазосига ҳукм қилинган Фито номи билан танилган “Лос Чонерос” жиноий гуруҳи етакчиси қамоқдан қочиб кетганидан сўнг вазият кескин ёмонлашди. Натижада бир қанча қамоқхоналарда тартибсизликлар юзага келди. Мамлакат ҳукумати фавқулодда ҳолат эълон қилди ва комендантлик соати жорий этди.
Эквадор президенти Даниэль Нобоа мамлакатда ички қуролли можаро бошланганини эълон қилди. 10 январга ўтар кечаси қуролли тўдалар мамлакатда тартибсизликлар содир этди.
Изоҳ (0)