Ekvadorda 12 yil davomida qamoqda o‘tirgan Los Choneros mafioz guruhining taniqli rahbari Adolfo Masiyas Vilyamar (laqabi Fito) qamoqxonadan g‘oyib bo‘ldi. Bu haqda BBC xabar berdi.
Vilyamar saqlangan kamera Guayakildagi qamoqxonaning bir qismida joylashgan bo‘lib, u nazariy jihatdan yuqori ehtiyotkorlik bilan qo‘riqlanishi kerak. Ekvador prezidenti Daniel Noboa holat yuzasidan 60 kunlik favqulodda holat e’lon qildi. Bu jamoat yig‘ilishlarini vaqtincha taqiqlash va komendantlik soatini o‘z ichiga oladi.
“Narkoterror guruhlari bizni qo‘rqitmoqchi va biz ularning talabiga bo‘ysunamiz deb o‘ylashadi. Ammo terrorchilar bilan muzokaralar olib bormaymiz va mamlakatda tinchlik o‘rnatmagunimizcha tinchlanmaymiz”, — dedi prezident Noboa.
35 yoshli Daniel Noboa 2023-yilning oktyabrida bo‘lib o‘tgan prezidentlik saylovlarida g‘alaba qozongan. Saylov kampaniyasi vaqtida nomzodlardan biri, sobiq jurnalist va mafiyaga qarshi kurashchi Fernando Vilyavisensio o‘ldirilgan, siyosatchiga tahdid qilgan “Los Choneros” va Fitoning shaxsan bu qotillikka aloqadorligi gumon qilinmoqda.
Mafioz qachon g‘oyib bo‘lgani noma’lum
Ekvador politsiyasi Fito o‘z kamerasida yo‘qligini 7-yanvar (yakshanba kuni) aniqlagan. Ular uni qamoqxonaning qattiq himoyalangan qismi bo‘ylab qidirishgan, lekin topa olishmagan.
Fito qochib ketganmi yoki katta qamoqxona majmuasi ichida yashiringanmi, hozircha aniq emas. Politsiya, shuningdek, Fito kameradan aniq qachon g‘oyib bo‘lganini ham bilmaydi. Politsiya boshlig‘ining so‘zlariga ko‘ra, yuzlab politsiyachilar Fitoni qidirgan va qidirmoqda.
Mintaqaviy qamoqxona (La Regional) beshta axloq tuzatish muassasasini o‘z ichiga olgan qamoqxona majmuasining bir qismidir. Ularda 12 mingdan ortiq mahbuslar saqlanadi.
2023-yilning avgust oyida Fito majmuadagi boshqa qamoqxona – La Rokaga ko‘chirilgan edi. Bu ko‘proq ishonchli muassasa hisoblanadi, chunki u yerda mahbuslar kamroq. Fitoning ko‘chirilishi bir necha ming askar ishtirokidagi harbiy operatsiya sifatida tashkil etilgan.
Ammo tez orada Fitoning advokati uning ko‘chirilishiga qarshi apellyatsiya bergan va yutib chiqqan, shundan so‘ng mafioz La Regional’ga qaytarilgan.
Mafioz avval ham qochib ketgan
Avval ham Fito bir marta mazkur qamoqxonadan qochib ketgan. 2013-yilda u va yana 17 mahbus La Rokadan qochib, majmuaga chegaradosh daryo bo‘ylab qayiqlarga o‘tishgan.
To‘rt oy o‘tgach, Fito va uning ukasi, shuningdek, Los Choneros a’zosi, Manta shahridagi onalarining uyida qo‘lga olingan. O‘shandan beri Fito qamoqdan chiqmagan. Shu bilan birga, u 2020-yilda, avvalgi rahbar Xorxe Luis Sambranoning o‘ldirilishidan so‘ng, qamoqdagi guruhning yetakchisiga aylandi.
Los Choneros asosan giyohvand moddalar savdosi hamda reketchilik bilan shug‘ullanadi va Meksikaning kuchli Sinaloa karteli bilan hamkorlik qiladi.
Izoh (0)