Ekvador g‘arbidagi Guayakil shahrida tartibsizliklar oqibatida kamida 10 kishi jumladan ikki nafar politsiya xodimi halok bo‘ldi, deb xabar bermoqda milliy politsiya.
El Universal maʼlumotlariga ko‘ra, shahar shimolida nomaʼlum shaxslar avtomobillarga qarata o‘q uzishi oqibatida besh kishi halok bo‘lgan, maktab o‘quvchisi yaralangan. Yaqin atrofda bir guruh qurollangan shaxslar ehtiyot qismlar omboriga bostirib kirib, yana uch kishini o‘ldirgan.
Segura EP munitsipal hukumat xavfsizlik kompaniyasi direktori Andres Sandovalning so‘zlariga ko‘ra, ikki soat ichida — soat 14:00 dan 16:00 gacha (Toshkent vaqti bilan 00:00 — 02:00) kompaniya jami 1932 ta qo‘ng‘iroq va 650 ta favqulodda vaziyat chaqirig‘ini qabul qilgan.
Kompaniya ma’lumotlariga ko‘ra, bir yarim soat ichida beshta shahar kasalxonasi qo‘lga olingan, ikkita mashina va ikkita mototsikl yonib ketgan.
Primicias nashri politsiya kamida 18 nafar jangarini qo‘lga olgani haqida xabar berdi.
8-yanvardan boshlab Ekvadorda jinoiy guruhlar faollashdi. Bir qancha qamoqxonalarda tartibsizliklar yuzaga kelib, mamlakatning eng yirik jinoiy to‘dalari – “Los Choneros” va “Los Lobos” yetakchilari hibsdan qochib ketdi. Politsiya turli obyektlarga o‘t qo‘yishga urinishlar va politsiya xodimlariga, jumladan portlovchi moddalar yordamida hujum qilish holatlari haqida xabar berdi. Guayakilda qurollangan shaxslar TC Televisión telekanali binosiga bostirib kirib, jurnalistlarni garovga oldi.
Ekvador prezidenti Daniel Noboa jinoiy faollikning kuchayishi fonida mamlakatda ichki qurolli mojarolar rejimi va 60 kunlik favqulodda holat e’lon qildi. U harbiylarga terrorchi deb tan olgan jinoiy guruhlar a’zolarini zararsizlantirish bo‘yicha ko‘rsatma berdi. Ekvador Milliy Assambleyasi (parlamenti) jinoiy guruh aʼzolarini zararsizlantirish bo‘yicha operatsiya davomida harbiylar va politsiya o‘z vakolatlaridan chiqib ketsa, ularga amnistiya vaʼda qildi.
TC Televisión binosiga bostirib kirgan 10 dan ortiq jinoyatchining ba’zilari hibsga olingan. Ekvador Bosh prokuraturasi aniqlik kiritishicha, hujumning barcha ishtirokchilari terrorchilikda ayblanishi mumkin. Tahririyatga uyushtirilgan hujum oqibatida hech kim halok bo‘lmagan, deya qo‘shimcha qildi idora.
Izoh (0)