Kreml Rossiyaning AQSHdagi muzlatilgan aktivlarini musodara qilish oqibatidan ogohlantirdi

AQSH Rossiya aktivlarini musodara qilgan taqdirda oqibatlarga duch keladi. Bu haqda Kreml matbuot kotibi Dmitriy Peskov “RIA Novosti”ga ma’lum qildi.

“Gap o‘ta provokatsion bayonot haqida ketmoqda, bu bizning mulkimizga, aktivlarimizga nisbatan noqonuniy xatti-harakatlar ehtimolini o‘z ichiga oladi. Bu chuqur oqibatlarga olib kelmasligi mumkin emas”, — deya ta’kidladi Kreml vakili.

Shuningdek, Peskov Oq uy Moskvaning muzlatilgan aktivlarini musodara qilishga qaratilgan qonun loyihasini qo‘llab-quvvatlayotgani haqidagi xabarga munosabat bildirdi. Jumladan, qarorni qo‘llab-quvvatlash AQSHning moliyaviy nufuzi va xalqaro investorlarning unga bo‘lgan ishonchini susaytirishga qaratilgan qadam ekanini aytdi. Peskov bu borada AQSH Moskvani xabardor qilmagani, Vashington bilan aloqa kanallari deyarli yo‘qligini ta’kidladi.

“Asosan ular (AQSH) yevropaliklarga bosim o‘tkazishga harakat qilmoqda. Bu yerda vaziyat juda paradoksal, chunki bizning aktivlarimizning asosiy qismi Amerikada emas, Yevropada. Har doimgidek, amerikaliklar asosan yevropaliklarni noqonuniy xatti-harakatlarga undashni istaydi va ular amerikaliklarning yo‘l-yo‘rig‘iga ergashsa, kelajakda muqarrar yo‘qotishlar, jarimalar, huquqiy oqibatlarga duch keladi”, — dedi Kreml matbuot kotibi.