АҚШ Россия активларини мусодара қилган тақдирда оқибатларга дуч келади. Бу ҳақда Кремль матбуот котиби Дмитрий Песков “РИА Новости”га маълум қилди.
“Гап ўта провокацион баёнот ҳақида кетмоқда, бу бизнинг мулкимизга, активларимизга нисбатан ноқонуний хатти-ҳаракатлар эҳтимолини ўз ичига олади. Бу чуқур оқибатларга олиб келмаслиги мумкин эмас”, — дея таъкидлади Кремль вакили.
Шунингдек, Песков Оқ уй Москванинг музлатилган активларини мусодара қилишга қаратилган қонун лойиҳасини қўллаб-қувватлаётгани ҳақидаги хабарга муносабат билдирди. Жумладан, қарорни қўллаб-қувватлаш АҚШнинг молиявий нуфузи ва халқаро инвесторларнинг унга бўлган ишончини сусайтиришга қаратилган қадам эканини айтди. Песков бу борада АҚШ Москвани хабардор қилмагани, Вашингтон билан алоқа каналлари деярли йўқлигини таъкидлади.
“Асосан улар (АҚШ) европаликларга босим ўтказишга ҳаракат қилмоқда. Бу ерда вазият жуда парадоксал, чунки бизнинг активларимизнинг асосий қисми Америкада эмас, Европада. Ҳар доимгидек, америкаликлар асосан европаликларни ноқонуний хатти-ҳаракатларга ундашни истайди ва улар америкаликларнинг йўл-йўриғига эргашса, келажакда муқаррар йўқотишлар, жарималар, ҳуқуқий оқибатларга дуч келади”, — деди Кремль матбуот котиби.
Изоҳ (0)