Eron harbiy dengiz kuchlari Amerika neft tankeri qo‘lga olinganini ma’lum qildi

Eron harbiy dengiz kuchlari Ummon ko‘rfazi suvlarida Amerika neft tankeri qo‘lga olingani haqida xabar berdi, deb yozadi Tasnim.

Hibsga olish sud qarori ijrosi doirasida amalga oshirilgan, deya ma’lum qildi Eron dengiz floti. Hibsga olingan tanker AQSH tomonidan 2023-yil sentyabr oyida Gretsiyaning Empire Navigation yuk tashish kompaniyasidan sanksiyalarni buzgan holda Eron neftini tashish uchun musodara qilingan edi.

Bugun, 11-yanvar kuni Buyuk Britaniyaning Dengiz savdosini muvofiqlashtirish markazi Ummon ko‘rfazidagi kemaga Suhar shahridan 50 dengiz milya sharqida bir necha qurollangan kishilar bostirib kirganini ma’lum qildi. Tanker bilan aloqa uzildi. Tanker bortida 19 kishi bo‘lgan, deb yozadi Gretsiyaning “Efimerida ton Sindakton” gazetasi.

Reuters agentligiga ko'ra, gap Empire Navigation kompaniyasiga tegishli St. Nikolas tankeri haqida ketmoqda. Agentlik maʼlumotlariga ko‘ra, u Iroq neftini Basradan Turkiyaga Suvaysh kanali orqali olib o‘tgan. 

Al Jazeera telekanali xabar berishicha, kema avval Suez Rajan nomi bilan atalgan. 2022-yilda AQSH Adliya vazirligi tanker sanksiyalarni chetlab o‘tib, Eron neftini Fors ko‘rfazidagi Xarg orolidan olib ketayotganini ma’lum qilgandi. Tanker va unda tashilgan 1 million barrel neft musodara qilindi.