Sog‘liqni saqlash vazirligining tegishli buyrug‘i bilan Amrillo Inoyatov Salomatlik va strategik rivojlanish instituti direktori lavozimiga tayinlandi. Bu haqda vazirlik matbuot xizmati xabar berdi.
Amrillo Inoyatov 1979-yilda tug‘ilgan. 2001-yil Buxoro davlat tibbiyot institutini, 2005-yilda Toshkent tibbiyot akademiyasida “Bolalar yuz-jag‘ jarrohligi” mutaxassisligi bo‘yicha aspiranturani tamomlagan.
Mehnat faoliyatini 2001-yilda Buxoro davlat tibbiyot instituti ilmiy-tekshirish laboratoriyasida boshlagan. 2006—2014-yillarda ushbu institutning “Xirurgik stomatologiya” kafedrasi assistenti, mazkur kafedra mudiri, Stomatologiya fakulteti dekani vazifalarida ishlagan. 2014—2020-yillarda Toshkent davlat stomatologiya instituti Buxoro filialining Stomatologiya fakulteti dekani, ushbu filial direktori, Buxoro davlat tibbiyot instituti rektori sifatida faoliyat ko‘rsatgan.
Tibbiyot fanlari doktori, professor Amrillo Inoyatov 2020-yil iyulida O‘zbekiston prezidentining yoshlar, fan, taʼlim, sog‘liqni saqlash, madaniyat va sport masalalari bo‘yicha maslahatchisi o‘rinbosari lavozimiga tayinlangan.
2020-yil 3-noyabrdan 2022-yil dekabr oyiga qadar sog‘liqni saqlash vazirining birinchi o‘rinbosari vazifasida ishlagan. 2022-yil dekabr oyida sog‘liqni saqlash vaziri etib tayinlangan.
2024-yil 4-yanvar kuni prezidentning tegishli farmoniga ko‘ra sog‘liqni saqlash vaziri vazifasini bajarish Prezident administratsiyasi Ijtimoiy rivojlanish departamenti rahbarining birinchi o‘rinbosari Asilbek Xudayarov zimmasiga yuklatilgani to‘g‘risida xabar berilgandi.
Izoh (0)