Соғлиқни сақлаш вазирлигининг тегишли буйруғи билан Амрилло Иноятов Саломатлик ва стратегик ривожланиш институти директори лавозимига тайинланди. Бу ҳақда вазирлик матбуот хизмати хабар берди.
Амрилло Иноятов 1979 йилда туғилган. 2001 йил Бухоро давлат тиббиёт институтини, 2005 йилда Тошкент тиббиёт академиясида “Болалар юз-жағ жарроҳлиги” мутахассислиги бўйича аспирантурани тамомлаган.
Меҳнат фаолиятини 2001 йилда Бухоро давлат тиббиёт институти илмий-текшириш лабораториясида бошлаган. 2006—2014 йилларда ушбу институтнинг “Хирургик стоматология” кафедраси ассистенти, мазкур кафедра мудири, Стоматология факультети декани вазифаларида ишлаган. 2014—2020 йилларда Тошкент давлат стоматология институти Бухоро филиалининг Стоматология факультети декани, ушбу филиал директори, Бухоро давлат тиббиёт институти ректори сифатида фаолият кўрсатган.
Тиббиёт фанлари доктори, профессор Амрилло Иноятов 2020 йил июлида Ўзбекистон президентининг ёшлар, фан, таълим, соғлиқни сақлаш, маданият ва спорт масалалари бўйича маслаҳатчиси ўринбосари лавозимига тайинланган.
2020 йил 3 ноябрдан 2022 йил декабрь ойига қадар соғлиқни сақлаш вазирининг биринчи ўринбосари вазифасида ишлаган. 2022 йил декабрь ойида соғлиқни сақлаш вазири этиб тайинланган.
2024 йил 4 январь куни президентнинг тегишли фармонига кўра соғлиқни сақлаш вазири вазифасини бажариш Президент администрацияси Ижтимоий ривожланиш департаменти раҳбарининг биринчи ўринбосари Асилбек Худаяров зиммасига юклатилгани тўғрисида хабар берилганди.
Изоҳ (0)