Prezidentning tegishli qarori bilan Toshkent tibbiyot akademiyasining rektori Alisher Shodmonov sog‘liqni saqlash vazirining birinchi o‘rinbosari lavozimiga tayinlandi. Bu haqda SSV matbuot xizmati xabar berdi.
Alisher Shodmonov 1962-yilda Toshkent shahrida tug‘ilgan. 1985-yilda Andijon davlat tibbiyot institutini tamomlagan. 2009—2010-yillarda Andijon davlat tibbiyot institutining o‘quv ishlari bo‘yicha prorektori, 2010—2015-yillarda Andijon davlat tibbiyot instituti rektori lavozimlarida mehnat qilgan.
Alisher Shodmonov 2017-yilning fevral oyidan buyon sog‘liqni saqlash vaziri sifatida faoliyat olib borayotgandi. Sobiq vazir 2020-yilning iyulida Respublika ixtisoslashtirilgan kardiologiya ilmiy-amaliy tibbiyot markaziga davolanishga yotqizilgan. Uning o‘rniga bosh vazir o‘rinbosari Behzod Musayev vazirlikka rahbarlik qilgandi. O‘sha yilning avgust oyida Alisher Shodmonov ishga qaytgan.
Oliy Majlis Qonunchilik palatasi deputatlari 2020-yil 3-noyabr kuni O‘zbekiston sog‘liqni saqlash vaziri lavozimiga Abduhakim Xojiboyev nomzodini ma’qullagan. Alisher Shodmanov esa Toshkent tibbiyot akademiyasi rektori etib tayinlangandi.
Izoh (0)