2023-yilda oziq-ovqat mahsulotlarining jahon narxlari 13,7 foizga arzonlashdi. Dekabr oyida narxlar yillik hisobda 10,1% ga kamaydi. Bu haqda FAO (Birlashgan Millatlar Tashkilotining Oziq-ovqat va qishloq xo‘jaligi tashkiloti) sharhida ma’lum qilindi.
Dekabr oyida don narxi indeksi noyabr oyiga nisbatan 16,6 foizga yuqori bo‘ldi.
“Bir qator yirik eksport qiluvchi mamlakatlarning logistika tizimidagi ob-havo bilan bog‘liq uzilishlar va Qora dengiz mintaqasidagi keskinliklar ta’sirida kuchli talab fonida dekabr oyida bug‘doyning eksport narxlari oshishi qayd etildi. Bundan avval bug‘doyning jahondagi narxi to‘rt oy ketma-ket pasaygandi. Dekabr oyida makkajo‘xori uchun ham jahon narxlarining oshishi qayd etildi”, — deyiladi FAO hisobotida.
2023-yil oxirida don narxi indeksi 15,4 foizga kamaydi.
O‘simlik yog‘i narxlari indeksi noyabr oyida qisqa muddatli o‘sishdan so‘ng dekabr oyida 1,4% ga kamaydi. Bu dinamika yetakchi importyorlar tomonidan xarid hajmining kamayishi fonida palma, soya va kungaboqar yog‘larining jahon narxlari pasayishini aks ettiradi.
2023-yilda jahon bozorida yog‘ taklifining oshishi tufayli narxlar indeksi 32,7 foizga pasayib, so‘nggi uch yildagi eng past ko‘rsatkichga aylangani ham hisobotda qayd etildi.
Shuningdek, 2023-yil oxirida shakar narxlari indeksi 26,7 foizga oshib, 2011-yildan beri eng yuqori darajaga yetgani ham ta’kidlangan.
FAO oziq-ovqat narxlari indeksi beshta asosiy oziq-ovqat tovarlari guruhi uchun xalqaro narxlar dinamikasini kuzatuvchi o‘rtacha ko‘rsatkichdir.
Izoh (0)