2023 йилда озиқ-овқат маҳсулотларининг жаҳон нархлари 13,7 фоизга арзонлашди. Декабрь ойида нархлар йиллик ҳисобда 10,1% га камайди. Бу ҳақда FAO (Бирлашган Миллатлар Ташкилотининг Озиқ-овқат ва қишлоқ хўжалиги ташкилоти) шарҳида маълум қилинди.
Декабрь ойида дон нархи индекси ноябрь ойига нисбатан 16,6 фоизга юқори бўлди.
“Бир қатор йирик экспорт қилувчи мамлакатларнинг логистика тизимидаги об-ҳаво билан боғлиқ узилишлар ва Қора денгиз минтақасидаги кескинликлар таъсирида кучли талаб фонида декабрь ойида буғдойнинг экспорт нархлари ошиши қайд этилди. Бундан аввал буғдойнинг жаҳондаги нархи тўрт ой кетма-кет пасайганди. Декабрь ойида маккажўхори учун ҳам жаҳон нархларининг ошиши қайд этилди”, — дейилади FAO ҳисоботида.
2023 йил охирида дон нархи индекси 15,4 фоизга камайди.
Ўсимлик ёғи нархлари индекси ноябрь ойида қисқа муддатли ўсишдан сўнг декабрь ойида 1,4% га камайди. Бу динамика етакчи импортёрлар томонидан харид ҳажмининг камайиши фонида палма, соя ва кунгабоқар ёғларининг жаҳон нархлари пасайишини акс эттиради.
2023 йилда жаҳон бозорида ёғ таклифининг ошиши туфайли нархлар индекси 32,7 фоизга пасайиб, сўнгги уч йилдаги энг паст кўрсаткичга айлангани ҳам ҳисоботда қайд этилди.
Шунингдек, 2023 йил охирида шакар нархлари индекси 26,7 фоизга ошиб, 2011 йилдан бери энг юқори даражага етгани ҳам таъкидланган.
FAO озиқ-овқат нархлари индекси бешта асосий озиқ-овқат товарлари гуруҳи учун халқаро нархлар динамикасини кузатувчи ўртача кўрсаткичдир.
Изоҳ (0)