Қосимовдан Азимовгача: Ўзбекистонда фаолият юритаётган прокурор-ҳокимлар ҳақида

Ўзбекистон президентининг 1992 йил 8 январдаги “Ўзбекистон Республикаси прокуратура органлари тўғрисида”ги фармони қабул қилинган бўлиб, унга кўра собиқ Иттифоқ қарамоғидаги Ўзбекистон ССР прокуратураси мустақил Ўзбекистон прокуратурасига айлантирилганди. Шундан бери Ўзбекистонда 8 январь Прокуратура ходимлари куни сифатида нишонлаб келинади. 

“Дарё” мазкур сана муносабати билан Ўзбекистонда фаолият юритаётган ҳокимлар орасида прокуратура тизимидан чиққан амалдорларни жамлади. Аниқланишича, мамлакатда фаолият юритаётган вилоят, туман ва шаҳар ҳокимларининг 20 нафари прокуратура тизимидан чиққан раҳбарлар ҳисобланади.

Маълум бўлишича, Ўзбекистонда фаолият юритаётган амалдаги вилоят ҳокимлари орасида Сурхондарё вилояти ҳокими Улуғбек Қосимов, Қашқадарё вилояти ҳокими Муроджон Азимов ҳамда Тошкент шаҳри ҳокими Шавкат Умрзоқов прокуратура тизимидан чиққан. 

Айни кунда пойтахтга раҳбарлик қилаётган Шавкат Умрзоқов прокуратура тизимидаги фаолиятини 2011 йил бошлаган бўлиб, шу йилдан 2013 йилнинг сентябригача Тошкент вилояти прокуратурасининг иқтисодий жиноятларга ва коррупцияга қарши курашиш бошқармаси бошлиғи сифатида ишлаган. 2018 йилнинг март-июнь ойларида эса Ўзбекистон Республикаси бош прокурори ўринбосари сифатида фаолият юритган.

Сурхондарё вилояти ҳокими Улуғбек Қосимов эса ҳокимликка қадар Тошкент шаҳар прокурори лавозимида фаолият юритган. Қашқадарё вилояти ҳокими, генерал майор Муроджон Азимов ҳам 2016 йилдан 2018 йилнинг февралига қадар Ўзбекистон бош прокурорининг биринчи ўринбосари лавозимида ишлаган. 

Ўзбекистонда шунингдек, мавжуд 200 нафар шаҳар ва туман ҳокимлари орасида ҳам прокуратурадан чиққан амалдорлар кўп.

Жумладан Қашқадарё вилоятининг Ғузор ва Шаҳрисабз тумани ҳокимлари ҳам прокуратурадан чиққан раҳбарлар ҳисобланади. Айни пайтда Ғузор ҳокими сифатида ишлаб келаётган Бекзод Суюнов 2018 йилнинг август ойидан 2020 йилга қадар шу туман прокурори лавозимида ишлаган.

Сурхондарё вилоятининг Сариосиё ва Бандихон тумани ҳокимлари — Абдуқодир Донаев ҳамда Абдумалик Алламурадовлар ҳам прокуратура “нонини еган” раҳбарлар ҳисобланади. Сариосиё ҳокими сифатида ишлаб келаётган Абдуқодир Донаев 2005—2022 йилларда прокуратура органларида турли лавозимларда, 2022 йилдан ҳокимликка қадар эса Тошкент шаҳрининг Яшнобод тумани прокурори лавозимида ишлаган.

Тошкент вилоятидаги мавжуд 22 нафар ҳокимлардан Қибрай тумани ҳокими Музаффар Рашидов Тошкент вилоятидаги туманга раҳбарлигидан олдин Оҳангарон тумани прокурори лавозимида ишлаган. Тошкент шаҳридаги 12 та туманда раҳбарлик қилаётган ҳокимларнинг икки нафари ҳам айнан прокуратура тизимидан чиққан. Пойтахт шаҳарнинг ягона аёл ҳокими бўлмиш Нилуфар Аллабергенова Яккасарой тумани раҳбарлигига ўтишидан аввал айнан шу туман прокурори сифатида иш олиб борган.

Аллабергенова хоним 1995—2023 йилларда прокуратурада турли лавозимларда фаолият юритган.

Юнусобод тумани ҳокими Баҳодир Абдувалиев ҳам ҳокимликка киришгунга қадар — 2019 йилнинг 2022 йилнинг январь ойигача Тошкент шаҳар прокурори ўринбосари лавозимида ишлаган. 

Қолаверса, Ўзбекистондаги ҳокимлардан Андижон вилоятининг Улуғнор тумани ҳокими Муҳаммадисломиддин Аҳмаджонов, Жиззах вилоятининг Пахтакор ва Арнасой ҳокимлари, Навоий вилоятининг Конимех тумани ҳокими, Хоразм вилоятининг Янгибозор ва Урганч тумани ҳокимлари, Самарқанд вилоятининг Булунғур ва Самарқанд, Қорақалпоғистоннинг Хўжайли тумани ҳокими, Фарғона вилоятининг Олтиариқ тумани ҳокими Шамсиддин Турдалиевлар ҳам прокуратура тизимидан чиққан амалдорлар ҳисобланади.