Tokio xorijiy tillar universiteti kichik ilmiy xodimi Xidaka Shinsuke New Express + Uzbek language nomli o‘quv qo‘llanmasini ishlab chiqdi, deb xabar bermoqda “Dunyo” AA.
Lotin alifbosida yozilgan ushbu qo‘llanma 160 bet va 20 ta darsdan iborat. Darslik boshlang‘ich darajada o‘zbek tilini o‘rganayotganlarga mo‘ljallangan bo‘lib, u o‘zbek tili grammatikasi haqida tushuncha beradi. Shu bilan birga, o‘quvchilarga og‘zaki so‘zlash ko‘nikmalarini shakllantirish maqsadida kitobning ovozli shakllari ham tayyorlangan.
Muallifning aytishicha, mazkur o‘quv qo‘llanma orqali bemalol O‘zbekistonda tarjimonsiz sayohat qilish yoki biznes tashriflarini amalga oshirish mumkin bo‘ladi.
New Express + Uzbek language qo‘llanmasi Hakusuisha Publishing Co., Ltd. nashriyot uyi tomonidan chop etilgan bo‘lib, 29-yanvardan boshlab sotuvga chiqariladi.
Ma’lumot uchun, Xidaka Shinsuke PhD ilmiy darajasiga ega. U 2007-yildan buyon o‘zbek tilini o‘rganib kelmoqda. 2014—2016-yillarda O‘zbekiston Fanlar akademiyasida ilmiy izlanishlar olib borgan hamda O‘zbekiston davlat jahon tillari universiteti va “O‘zbekiston-Yaponiya” markazida yapon tilidan dars bergan. Xidaka Shinsuke 2021-yil aprel oyida Tokio xorijiy tillar universiteti qoshidagi Open Academy dasturi negizida o‘zbek tili kurslari ochgan.
Izoh (0)