Oliy Majlis Senatining qirq sakkizinchi yalpi majlisida Toshkent shahridagi piyodalar o‘tish ko‘priklaridagi eskalator va liftlarning ishlamasligi yoshi katta insonlar, nogironligi bo‘lgan shaxslar hamda yosh bolali ayollarga noqulaylik tug‘dirayotgani, shu kabi qurilmalar risoladagidek ishlashi lozimligi masalasi ko‘tarilgan edi.
Ushbu masala yuzasidan Senat matbuot xizmatining ma’lum qilishicha, Mudofaa va xavfsizlik masalalari qo‘mitasi tomonidan dastlabki o‘rganishlar olib borilgan.
“Bugungi kunda Toshkent shahar sun’iy inshootlaridan foydalanish, ularni saqlash va ta’mirlash ixtisoslashtirilgan boshqarmasi tasarrufida jami 5 ta piyodalar o‘tish yo‘lagi mavjud, ushbu yo‘laklarning 3 tasiga 8 ta lift va 8 ta eskalator o‘rnatilgan hamda ularga ‘Lift Proyekt’ MCHJ korxonasi tomonidan xizmat ko‘rsatib kelinadi.
Shuningdek, ‘Toshkent metropoliteni’ DUKga qarashli metropolitenning ayrim bekatlari, xususan, ‘O‘zbekiston temir yo‘llari’ AJ tomonidan yerusti metrosining 4 (Olmos), 5 (Rohat), 10 (Tolariq), 13 va 14-bekatlarida o‘rnatilgan eskalatorlar ishdan chiqqani aniqlangan”, — deyiladi Senat axborotida.
Qo‘shimcha qilinishicha, yuqoridagilardan kelib chiqib, eskalator va liftlarni to‘liq ishga tushirish choralarini ko‘rish hamda bajarilgan ishlar natijalari yuzasidan ma’lumot taqdim etishni so‘rab, Toshkent shahar hokimi hamda “O‘zbekiston temir yo‘llari” aksiyadorlik jamiyati boshqaruv raisiga rasmiy xat jo‘natildi.
Senatning navbatdagi yalpi majlisida mas’ul tashkilot rahbarlarining axborotlarini eshitish belgilangan.
Izoh (0)