Ерусти метросининг 5 та бекатида эскалаторлар ишдан чиққан — Сенат

Олий Мажлис Сенатининг қирқ саккизинчи ялпи мажлисида Тошкент шаҳридаги пиёдалар ўтиш кўприкларидаги эскалатор ва лифтларнинг ишламаслиги ёши катта инсонлар, ногиронлиги бўлган шахслар ҳамда ёш болали аёлларга ноқулайлик туғдираётгани, шу каби қурилмалар рисоладагидек ишлаши лозимлиги масаласи кўтарилган эди.

Ушбу масала юзасидан Сенат матбуот хизматининг маълум қилишича, Мудофаа ва хавфсизлик масалалари қўмитаси томонидан дастлабки ўрганишлар олиб борилган.

“Бугунги кунда Тошкент шаҳар сунъий иншоотларидан фойдаланиш, уларни сақлаш ва таъмирлаш ихтисослаштирилган бошқармаси тасарруфида жами 5 та пиёдалар ўтиш йўлаги мавжуд, ушбу йўлакларнинг 3 тасига 8 та лифт ва 8 та эскалатор ўрнатилган ҳамда уларга ‘Лифт Проект’ МЧЖ корхонаси томонидан хизмат кўрсатиб келинади.

Шунингдек, ‘Тошкент метрополитени’ ДУКга қарашли метрополитеннинг айрим бекатлари, хусусан, ‘Ўзбекистон темир йўллари’ АЖ томонидан ерусти метросининг 4 (Олмос), 5 (Роҳат), 10 (Толариқ), 13 ва 14-бекатларида ўрнатилган эскалаторлар ишдан чиққани аниқланган”, — дейилади Сенат ахборотида.

Қўшимча қилинишича, юқоридагилардан келиб чиқиб, эскалатор ва лифтларни тўлиқ ишга тушириш чораларини кўриш ҳамда бажарилган ишлар натижалари юзасидан маълумот тақдим этишни сўраб, Тошкент шаҳар ҳокими ҳамда “Ўзбекистон темир йўллари” акциядорлик жамияти бошқарув раисига расмий хат жўнатилди.

Сенатнинг навбатдаги ялпи мажлисида масъул ташкилот раҳбарларининг ахборотларини эшитиш белгиланган.