Toshkent viloyati Piskent tumanida erkak o‘z tanishini do‘pposlagani aks etgan videoni tarmoqlarda tarqatib yubordi. Viloyat IIBB ushbu shaxs qo‘lga olinganini va choralar ko‘rilayotganini maʼlum qildi.
Xabar berilishicha, holat Toshkent viloyati IIBB tezkor-qidiruv xizmati xodimlari tomonidan o‘rganildi. 2023-yilning may oylarida Piskent tumanida yashovchi, 1986-yilda tug‘ilgan Temur va uning tanishi, 1990-yilda tug‘ilgan Igor (mastlik holatida bo‘lgan) o‘rtasida o‘zaro kelishmovchilik sabab janjal kelib chiqqan.
Temur janjal vaqtida Igorning turli joylariga urgan va mazkur holat atrofdagi ovqatlanish shoxobchasining kuzatuv kamerasiga tushib qolgan. Shundan so‘ng u holat aks etgan videoyozuvni shaxsiy telefoniga suratga olgan va oradan 8 oy o‘tib, 2024-yil 1-yanvar kuni o‘zining Instagram tarmog‘idagi sahifasiga joylashtirgan.
Hozirda mazkur holat yuzasidan ushlangan shaxsni Ma’muriy javobgarlik to‘g‘risidagi kodeksning 183-moddasi (mayda bezorilik) va 189,1-moddasi (zo‘ravonlikni targ‘ib qiluvchi materiallarni tarqatish) bilan javobgarlikka tortish choralari ko‘rilmoqda.
Qayd etilishicha, o‘tgan davr mobaynida ushbu holat yuzasidan IIOga yoki tibbiyot birlashmasiga biror-bir murojaat kelib tushmagan.
Izoh (0)