Жиззах вилояти Ғаллаорол туманида босқинчилик жиноятини содир этган шахслар ушланган. Бу ҳақда ИИВ ҳузуридаги Тергов департаменти хабар бермоқда.
Маълум қилинишича, 2023 йил 18 ноябрь кунига ўтар кечаси уч нафар номаълум шахс Ғаллаорол туманининг “Оқтом” маҳалласида яшовчи 70 ёшли фуқаронинг хонадонига кирган. Уйдан моддий қимматликлар топа олмаган жиноятчилар оила бошлиғи ва унинг турмуш ўртоғига зўрлик ишлатган. Сўнг эркак ва аёлга ҳаёт учун хавфли бўлган оғир тан жароҳатлари етказиб, воқеа жойидан яширинган.
Оқибатда 70 ёшли эркак ва унинг хотини Ғаллаорол тумани марказий шифохонасининг жонлантириш бўлимига ётқизилган. Кўрсатилган тиббий муолажаларга қарамай, эркак олти кундан сўнг вафот этган.
Ҳолат юзасидан Жиззах вилоят ИИБ ҳузуридаги Тергов бошқармаси томонидан жиноят иши қўзғатилган. Олиб борилган тезкор қидирув ҳаракатлари давомида босқинчилик қилган шахслар аниқланган.
Хусусан, Самарқанд вилояти Паст Дарғом тумани Сарибоши ва Пўлатчи маҳаллаларида яшовчи 1991, 1994 ва 1998 йилларда туғилган йигитлар ҳамда жабрланувчи билан битта маҳаллада яшовчи 36 ёшли шахс процессуал тарзда ушланган.
Гумон қилинувчилар ўз қилмишларини яшириш мақсадида ўзлари фойдаланган ниқоблар, қўлқоплар ва темир бўлагини Паст Дарғом тумани “Дўрмонсой” маҳалласидан оқиб ўтувчи каналга ташлаб юборган. ИИБ ходимлари томонидан ашёвий далиллар топилган ва ҳужжатлаштириб олинган.
Ҳолат юзасидан гумонланувчи тўрт нафар шахсга Жиноят кодексининг 164-моддаси (босқинчилик) 3-қисми “в”, “г” бандлари билан айблов эълон қилинган. Ҳозирда мазкур жиноят иши юзасидан дастлабки тергов ҳаракатлари олиб борилмоқда.
Бундан олдин Наманганда аёл эрининг эътиборини тортиш учун ўз уйида босқинчилик қилгани, Сирдарёда уйга ўғриликка тушиб, 14 ёшли қизни ўлдирган шахс 23 йилга озодликдан маҳрум этилгани тўғрисида хабар берилганди.
Изоҳ (0)