Andijonda do‘konga o‘g‘rilikka tushganlar 15 yoshli bolani urib, pichoq bilan tahdid qildi

Andijon viloyati Oltinko‘l tumanida do‘konga o‘g‘rilikka tushganlar 15 yoshli bolani urib, pichoq bilan unga tahdid qildi. Bu haqda Tergov departamenti axborot xizmati xabar berdi.

Unga ko‘ra, 56 yoshli S.N. Oltinko‘l tumani IIBga ariza bilan murojaat qilib, bu haqda ma’lum qilgan. 16-iyul kuni soat 00:30 larda ikki nafar nomaʼlum shaxs unga tegishli “Mehnat” MFY hududida joylashgan savdo do‘koniga kirib, do‘konda bo‘lgan 15 yoshli jiyani J.A.ni qo‘llari bilan urib, pichoq bilan qo‘rqitgan va unga tegishli bo‘lgan telefon, savdo do‘konida bo‘lgan 700 000 so‘m pullarini hamda qiymati 364 000 so‘mlik oziq-ovqat mahsulotlarini talon-toroj qilgan. 

Olib borilgan tergov-tezkor ishlari natijasida, mazkur jinoyatni Andijon shahrida yashovchi, muqaddam sudlangan 21 yoshli E.J. hamda voyaga yetmagan 16 yoshli M.I.lar sodir etgani aniqlangan. 

Mazkur holat yuzasidan Oltinko‘l tumani IIB huzuridagi Tergov guruhi tomonidan E.J. va M.I.larga nisbatan Jinoyat kodeksining 164-moddasi 2-qismi “a,b” bandlari (bosqinchilik) bilan jinoyat ishi qo‘zg‘atilib, gumon qilinuvchilar protsessual tartibda ushlangan.

Hozirda tergov harakatlari olib borilmoqda.