O‘zbekistonda tabiiy gaz aholiga to‘liq hajmda yetkazib berilmoqda — “Hududgazta’minot”

O‘zbekistonda aholiga tabiiy gaz to‘liq hajmda yetkazib berilayotgani, yetishmovchilik kuzatilmayotgani aytildi. 

“Hududgazta’minot” AJ tomonidan bayram kunlari arafasida tabiiy gazni teng taqsimlash va iste’molchilarga bir maromda yetkazib berish bo‘yicha barcha zaruriy choralar ko‘rilmoqda. Ta’kidlanishicha, hozirgi vaqtda tabiiy gaz iste’molchilariga zangori yoqilg‘i to‘liq hajmda yetkazib berilyapti, yetishmovchilik kuzatilmayapti.

2023-yilning 29-dekabr kuni gaz ta’minoti tashkilotlari tomonidan aholi va ulgurji iste’molchilarga 99,7 million kub metr tabiiy gaz yetkazib berildi. Shuningdek, suyultirilgan gaz iste’molchilariga 2622 tonna yoqilg‘i yetkazilgan.

Muammolar kuzatilgan joylarda gaz ta’minotini yaxshilash borasida soha mutaxassislari tomonidan barcha kerakli ishlar davom ettirilmoqda. Jumladan, avariya-tiklash jarayonlari tezkorlik bilan olib borilmoqda. 29-dekabr kuni avariya holatlari kuzatilmadi.

“Hududgazta’minot” AJ fuqarolardan gaz jihozlari ishlab turgan xonalarda dam olishga yo‘l qo‘ymaslikni va chiroqni yoqishdan oldin gaz hidi yo‘qligiga ishonch hosil qilib, u aniqlangan holda 104 telefon raqami orqali gaz xizmatiga murojaat qilishni so‘radi.