Жорий йилнинг 21 декабрь куни “Дарё” интернет-нашрида “Mediapark сервис хизмати йўқ телевизор сотмоқда. Бу харидорни алдашми ёки устидан кулиш?” сарлавҳали мақола чоп этилди. Унда журналист ҳамкасбларимиздан бири пойтахтдаги Mediapark дўконидан Samsung телевизорини сотиб олиб, ғаройиб саргузаштларга дуч келгани ҳикоя қилинган.
Хусусан, 15 миллион сўмга харид қилинган телевизор пультининг пастга босиладиган тугмаси ўз-ўзидан ишдан чиққанда, у Samsung расмий сервис марказига мурожаат қилади. Аммо сервисдагилар Mediapark’дан харид қилинган бу телевизор Ўзбекистон учун норасмий ҳисобланиши, шунинг учун улар бу маҳсулот учун кафолатли бепул сервис хизматини кўрсата олмаслигини маълум қилади.
Мазкур ҳолат бўйича Mediapark расмий муносабат билдириб ўтди. Унга кўра, мақолада келтирилган маҳсулот Ўзбекистон Республикаси ҳудудида фойдаланишга мувофиқлик сертификатига эга ва қонуний импорт қилинган.
“Мижозга расмий Samsung сервис марказларининг кафолатланган сервис хизматини кўрсатишни рад этиш ҳолати Samsung Electronics Uzbekistan МЧЖ ХКнинг ички компьютер тизимидаги техник хатолик натижасида юзага келган.
Расмий сервис ходимлари ўз тизимларидаги носозликдан бехабар маълумот берган. Бу бўйича Samsung Electronics Uzbekistan МЧЖ ХК келтирилган ноқулайлик учун расмий узр сўраган”, — дейилади Mediapark муносабатида.
Шунингдек, улар ўз мижозига ғамхўрлик кўрсатган ҳолда ишламай қолган маҳсулот пультини бепул алмаштириб беришларини ҳам таъкидлаб ўтишган.
“Дарё” интернет-нашри юзага келган вазиятга ойдинлик киритгани ва истеъмолчи ҳуқуқи тикланиши учун тегишли саъй-ҳаракатларни амалга оширгани учун Mediapark дўконига миннатдорлик билдириб ўтади.
Изоҳ (0)