Topilishida yordam berganlarga 40 mln so‘m va’da qilingan qidiruvdagi shaxs — Akromjon Abdullayev ushlandi. Bu haqda Toshkent viloyati IIBB matbuot kotibi xabar qildi.
18-dekabr kuni Toshkent shahar IIBB tomonidan og‘ir va o‘ta og‘ir jinoyat sodir etishda gumonlanib, tergovdan qochib, yashiringan uch kishiga qidiruv e’lon qilingandi:
- 1982-yilda tug‘ilgan Umarov Rustamjon To‘lanboyevich;
- 1990-yilda tug‘ilgan Abdullayev Akromjon Baxtiyorovich;
- 1995-yilda tug‘ilgan Pattayev Toxirjon Xakimboy o‘g‘li.
Ko‘rilgan tezkor chora-tadbirlar natijasida qidiruvdagi Rustamjon Umarov va Pattayev Toxirjon ushlangandi. Yana bir gumon qilinuvchi — Akromjon Abdullayevga qidiruv davom ettirilib, 23-dekabr kuni ushbu shaxsning qayerda ekani haqida xabar bergan yoki topishda ko‘maklashganlar uchun 40 mln so‘m mukofot e’lon qilingandi.
Ko‘rilgan tezkor chora-tadbirlar natijasida qidiruvdagi Akromjon Abdullayev Toshkent viloyati IIBB va IIV Qorovul qo‘shinlari xodimlari tomonidan ushlandi.
Shu tariqa og‘ir va o‘ta og‘ir jinoyat sodir etib qidiruvga berilgan uch nafar shaxsga nisbatan qidiruv harakatlari tugatildi.
Toshkent viloyati IIBB matbuot kotibi jarayonlarga befarq bo‘lmagan fuqarolar va qidiruv e’lonlarini keng yoritishga hissa qo‘shgan barcha OAV vakillariga minnatdorlik bildirdi.
Izoh (0)