Топилишида ёрдам берганларга 40 млн сўм ваъда қилинган қидирувдаги шахс — Акромжон Абдуллаев ушланди. Бу ҳақда Тошкент вилояти ИИББ матбуот котиби хабар қилди.
18 декабрь куни Тошкент шаҳар ИИББ томонидан оғир ва ўта оғир жиноят содир этишда гумонланиб, терговдан қочиб, яширинган уч кишига қидирув эълон қилинганди:
- 1982 йилда туғилган Умаров Рустамжон Тўланбоевич;
- 1990 йилда туғилган Абдуллаев Акромжон Бахтиёрович;
- 1995 йилда туғилган Паттаев Тохиржон Хакимбой ўғли.
Кўрилган тезкор чора-тадбирлар натижасида қидирувдаги Рустамжон Умаров ва Паттаев Тохиржон ушланганди. Яна бир гумон қилинувчи — Акромжон Абдуллаевга қидирув давом эттирилиб, 23 декабрь куни ушбу шахснинг қаерда экани ҳақида хабар берган ёки топишда кўмаклашганлар учун 40 млн сўм мукофот эълон қилинганди.
Кўрилган тезкор чора-тадбирлар натижасида қидирувдаги Акромжон Абдуллаев Тошкент вилояти ИИББ ва ИИВ Қоровул қўшинлари ходимлари томонидан ушланди.
Шу тариқа оғир ва ўта оғир жиноят содир этиб қидирувга берилган уч нафар шахсга нисбатан қидирув ҳаракатлари тугатилди.
Тошкент вилояти ИИББ матбуот котиби жараёнларга бефарқ бўлмаган фуқаролар ва қидирув эълонларини кенг ёритишга ҳисса қўшган барча ОАВ вакилларига миннатдорлик билдирди.
Изоҳ (0)