Yangi Zelandiyada vatandoshi tomonidan aldanib, ishsiz qolgan olti nafar o‘zbekistonlik Stuff nashriga o‘z ahvoli haqida xabar berganidan keyin, nashr o‘quvchilari tomonidan ularga yordam ko‘rsatildi.
Nashr yozishicha, angrenlik Nuriddin Abdullayev, Shukurjon Qo‘chqorov, Sirojiddin Usmonov, Ibrat Xatamov, Asliddin Jumanov va Diyorbek Komilboyev Yangi Zelandiyaga Zero Max Line shirkatiga egalik qiluvchi o‘zbekistonlik Sherzod Nosirov yordamida borgan va uning qo‘lida ishlashni boshlagan. Ammo Nosirov vatandoshlariga va’da qilingan maosh — soatiga 28 dollardan bermagach, ular ko‘proq pul talab qilishni boshlagan.
Oqibatda Nosirov o‘z shirkatini “tugatib”, g‘oyib bo‘lgan.
O‘zbekistonliklarning Stuff’ga murojaatidan so‘ng, ularga olti oyga Migrantlar Ekspluatatsiyasidan himoya vizalari berildi, turli kompaniyalar ish taklif qildi. Yana ikki o‘zbekistonlik Abror Razzoqov va Bahriddin Abdiyevga ham yordam ko‘rsatilgan.
Yangi Zelandiya immigratsiya xizmati (INZ) sobiq xodimi Stiven Vestvud erkaklarga yangi vizalar uchun bepul vakillik qildi.
“Ularning barchasi Stuff maqolasi uchun juda minnatdor, chunki bu ular uchun juda ko‘p imkoniyatlar eshigini ochdi”, — dedi Vestvud.
O‘zbekistonliklarni Yangi Zelandiyaga olib ketgan Nosirov ularga, hech qanday tajriba talab etilmagan holda uning kompaniyasida ishlab soatiga 28 dollar olishini aytgan. Erkaklar Nosirovga 17 000 dollar, vizalarni rasmiylashtirgani uchun taxminan 4 200 dan 5 900 dollargacha pul bergan. Yangi Zelandiyaga kelganidan so‘ng, ular jihozlar, kiyim-kechaklari, transport vositalari va SiteSafe sertifikatlari uchun ham pul to‘lagan.
Mamlakatga kelgach, muhojirlarga haftasiga atigi 20 soat ishlash kafolatlangani aytilgan xatlar topshirilgan: viza shartlarida bu 40 soat deyilgandi. Nosirov ularga avval va’da qilinganidan bir necha baravar kam haq to‘lanishini aytgan.
Izoh (0)