Янги Зеландияда ватандоши томонидан алданиб, ишсиз қолган олти нафар ўзбекистонлик Stuff нашрига ўз аҳволи ҳақида хабар берганидан кейин, нашр ўқувчилари томонидан уларга ёрдам кўрсатилди.
Нашр ёзишича, ангренлик Нуриддин Абдуллаев, Шукуржон Қўчқоров, Сирожиддин Усмонов, Ибрат Хатамов, Аслиддин Жуманов ва Диёрбек Комилбоев Янги Зеландияга Zero Мах Line ширкатига эгалик қилувчи ўзбекистонлик Шерзод Носиров ёрдамида борган ва унинг қўлида ишлашни бошлаган. Аммо Носиров ватандошларига ваъда қилинган маош — соатига 28 доллардан бермагач, улар кўпроқ пул талаб қилишни бошлаган.
Оқибатда Носиров ўз ширкатини “тугатиб”, ғойиб бўлган.
Ўзбекистонликларнинг Stuff’га мурожаатидан сўнг, уларга олти ойга Мигрантлар Эксплуатациясидан ҳимоя визалари берилди, турли компаниялар иш таклиф қилди. Яна икки ўзбекистонлик Аброр Раззоқов ва Баҳриддин Абдиевга ҳам ёрдам кўрсатилган.
Янги Зеландия иммиграция хизмати (ИНЗ) собиқ ходими Стивен Вествуд эркакларга янги визалар учун бепул вакиллик қилди.
“Уларнинг барчаси Stuff мақоласи учун жуда миннатдор, чунки бу улар учун жуда кўп имкониятлар эшигини очди”, — деди Вествуд.
Ўзбекистонликларни Янги Зеландияга олиб кетган Носиров уларга, ҳеч қандай тажриба талаб этилмаган ҳолда унинг компаниясида ишлаб соатига 28 доллар олишини айтган. Эркаклар Носировга 17 000 доллар, визаларни расмийлаштиргани учун тахминан 4 200 дан 5 900 долларгача пул берган. Янги Зеландияга келганидан сўнг, улар жиҳозлар, кийим-кечаклари, транспорт воситалари ва SiteSafe сертификатлари учун ҳам пул тўлаган.
Мамлакатга келгач, муҳожирларга ҳафтасига атиги 20 соат ишлаш кафолатлангани айтилган хатлар топширилган: виза шартларида бу 40 соат дейилганди. Носиров уларга аввал ваъда қилинганидан бир неча баравар кам ҳақ тўланишини айтган.
Изоҳ (0)